Salimjon Zokirov: “Jamoamizga yangi kelib qo'shilgan futbolchilar hali to'liq moslashib ketishmadi”

Bugungi uchrashuv noqulay ob-havo sharoitida o'tdi. Garchi uchrashuvni 17:00da boshlagan bo'lsakda, barbir aynan bugungi ob-havo juda issiq edi, bu o'z navbatida har ikki jamoaga bir oz noqulaylik tug'dirdi. Avvalo shuni aytish joizki, bugun raqiblarimiz ham faol o'yin namoyish etishdi.

Biz ayni damda turnir jadvaliga ikkinchi o'rindamiz, o'z o'rnimizni mustahkamlab olish, peshqadamga etib olish uchun bizga faqat va faqat g'alaba zarur edi. SHu bois biz bugun hujumkor futbol taktikasini tanlagandik. Birinchi bo'limda bizda qiyinchiliklar yuzaga keldi. Gol urib olgunimizgacha, to'g'risi juda og'ir o'yin o'tkazdik. Birinchi gol bizga ruhiy tomondan ustunlik berdi. Ikkinchi bo'limda ham jamoamiz azolari maydonda mardonavor kurash olib borishdi va yakunda yirik hisobda g'alaba qozondik.

Jamoamizga yangi kelib qo'shilgan futbolchilar hali to'liq bizning o'yin uslubimizga moslashib ketisha olgani yo'q.  Darvozabon Abrorbek Karimovning iqtidoriga shubha yo'q, lekin ayni damda Jasur Abdullaev yaxshi harakat qilmoqda. Albatta keyingi uchrashuvlarda Abrorbek Karimovni ham sinovdan o'tkazish rejamizda bor. Hoshimbek SHokirovga bir oz jismoniy tayyorgarlik etishmayapti chamamda. Bugun u maydonda ajoyib harakat qildi, tajribasi evaziga ko'plab vaziyatlarda raqiblardan ustunlik qildi, lekin biz bilamiz u bundan ham ko'prog'iga qodir. SHungidek bugun biz yosh iqtidorli hujumchi Sardorbek Solievni ham uchrashuv so'ngida maydonga tushirdik, bu o'z navbatida yosh iqtidor sohibiga mahorat maktabi bo'ladi deb hisoblayman.

Umuman olganda, shogirdlarimdan ko'ngldim to'q, biz Pro-Ligada yuqori o'rinlar uchun kurashayapmiz, jamoamiz oldiga aynan shunday vazifa qo'yilgan, biz bu vazifani uddalashga harakat qilamiz.  
 
Bekzod Tolibov yozib oldi.