Rustam Abduhamidov: "Amaldagi finalchilarning chiqib ketishi va "Qiziriq" O'zbekiston kubogining sensaciyasiga aylandi"

Muborakliklar OKMK, "Aral akademiya", "Buxoro" bilan bir guruhdan o'rin olgan edi. Asror Aliqulov shogirdlari yakunda 7 ochko bilan keyingi bosqichga yo'l oldi. Guruh bosqichidagi o'yinlar haqida "Mashal" futbolchisi Rustam Abduhamidov fikrlari bilan o'rtoqlashdi. 

"Avvalambor, barcha O'zbekiston xalqini qo'lga kiritilgan Olimpiada yo'llanmasi bilan tabriklayman. Terma jamoamiz Parijdagi musobaqada ham munosib ishtirok etishiga ishonamiz. Bevosita kubok bahslariga to'xtaladigan bo'lsak, oson bo'lmagan guruhda birinchi o'rinni egalladik. Amaldagi finalchi OKMK, Superligaga chiqishga asosiy davogar "Buxoro" bilan kuch sinashishimizga to'g'ri keldi. 

Gol o'tkazib yubormayotganimiz har bir o'yinga jiddiy yondashayotganimizdan. Murabbiylar ishlab chiqqan reja asosida o'ynamoqdamiz. Jamoaviy ish samarasini bermoqda. 

OKMK bilan o'yinga to'xtalsam, bunday kuchli jamoalarga bo'sh xudud berib bo'lmasdi. Aks holda sizni jazolashadi. Biz zich harakat qilib o'z imkoniyatlarimizni kutishimiz talab qilingandi. O'sha imkoniyat bo'ldi va yakunda g'alaba qozondik. 

Amaldagi finalchilarning guruhda qolib ketishi va "Qiziriq"ning keyingi bosqichga yo'llanma olishi sensaciya bo'lsa kerak",- deydi Rustam Abduhamidov.