Ro'ziqul Berdiev qanday jazo oladi?

Aziz Asimov 70-daqiqada "Nasaf"ning golini bekor qilgach jamoa ustozi Ro'ziqul Berdiev bosh hakamga keskin etiroz bildirdi va shogirdlarini maydondan olib chiqib ketmoqchi bo'ldi.

27 oktyabr kuni hakamlar va jurnalistlar ishtirokida o'tgan seminarda sobiq FIFA hakami, OFK instruktori Valentin Kovalenko o'sha vaziyatda Aziz Asimov to'g'ri qaror chiqarganini tahlil qilib berdi.

Superliganing 20-turidan o'rin olgan "Navbahor" - "Qizilqum" (0:0) uchrashuvida mehmonlar bosh murabbiyi Hamidjon Aktamov 1-taymdan keyin jamoani olib ketishini aytayotgani translyaciyada eshitilgandi. Navoiylik murabbiy "Navbahor" vakillarining o'z shogirdlarini "sindirishga" urinayotganidan g'azablangandi. 

Biroq, har 2 vaziyatda ham uchrashuv to'liq davom ettirildi. Garchi Berdiev faqat gap bilan cheklanib qolmagan bo'lsa ham. SHu o'rinda savol tug'iladi: Agar Aktamov yoki Berdiev uchrashuv davomida o'z jamoasini ruxsatsiz maydondan olib chiqib ketsa, nima bo'lar edi? 

Bunga javob topish uchun Intizom kodeksini "tilga kirgazamiz". Uning 5-bo'lim 2-bandida "Maydonni ruxsatsiz tark etgani, uchrashuvni davom ettirishdan bosh tortgani uchun" shunday sankciyalar belgilangan (klubga nisbatan):

1. texnik mag'lubiyat;

2. pul jarimasi (500 mln so'mgacha).

SHuningdek, O'zPFL matbuot xizmati komissar bildirgisiga asosan, “Nasaf” ustozining hatti-harakatlari Tartib-intizom qo'mitasiga oshirilganini malum qildi. 

Kodeksga tayanadigan bo'lsak, Ro'ziqul Berdievni quyidagi jazolardan biri kutib turibdi:

1. ogohlantirish;

2. pul jarimasi;

3. malum muddatga diskvalifikaciya qilish yoki rasmiy vazifalarni bajarishdan chetlatish.

Malumot uchun, Tartib-intizom qo'mitasiga kelib tushgan materiallar, ular ro'yxatdan o'tkazilgan kundan (26 oktyabr) boshlab o'n kun mobaynida ko'rib chiqiladi. 

"Bunyodkor" "Navbahor" futbolchisining ustidan shikoyat qiladi

Faxriddin Ro'ziev