Ravshan Xaydarov: Tailanddagi musobaqadan OCHga tayyorgarlik ko'rish uchun foydalanamiz

"Bizga bu musobaqada qatnashish taklifi berilganda bajonidil rozi bo'ldik. CHunki Tailanddagi turnir orqali yanvar oyida Xitoyda bo'ladigan Osiyo chempionatiga tayyorlanib olishni maqsad qilgan edik.

Ayni vaqtda kuniga ikki mahal mashg'ulot olib borilmoqda va futbolchilarning tayyorgarlik darajasini Myanma va Vetnamga qarshi o'yinlar orqali ko'rib olmoqchimiz. Aynan shu sababga ko'ra musobaqa tashkilotchilaridan iltimos qilib, zaxira almashtirishlari sonini uchtadan oltitaga ko'paytirdik. Biz imkon qadar ko'proq futbolchilarni sinovdan o'tkazishni maqsad qilganmiz.

Futbolchilarning sport formasini Osiyo chempionatiga qadar yuqori darajaga olib chiqish kerak. Ayni vaqtda ular optimal formada bo'lmasligi tabiiy. Bizning bu musobaqadan maqsadimiz ham ularning sport formasini ko'tarish va o'yin amaliyotini taminlab berish.

Bizda mavsum yaqinda yakuniga etdi. Aynan shu sababga ko'ra "Bunyodkor" bilan O'zbekiston Kubogi finalida o'ynagan Dostonbek Hamdamov va Rustam Ashurmatovlar alohida dastur bo'yicha tayyorlanyapti. Otabek SHukurov, Mirjamol Qosimov hamda Akrom Komilov uchun ham maxsus dastur ishlab chiqilgan.

SHuningdek O'zbekiston milliy terma jamoasi yig'inida bo'lgan Odil Hamrobekov ham hozircha maydonga tushishga to'liq tayyor emas. Bu futbolchilar Xitoyda bo'ladigan qita birinchiligiga optimal formada borishi lozim.

Tailandda bo'ladigan yig'inda terma jamoa tarkibi va o'yinini shakllantirish davom etmoqda. Bu musobaqa Osiyo chempionatiga tayyorgarlikda qo'l kelishiga ishonaman", - deydi Ravshan Haydarov.