Ravshan Haydarov: "O'yin jihatdan olib qarasak, durang adolatli natija bo'lardi"

"O'yin sifati, yigitlarning ruhiy holatidan ko'nglim to'ldi. Faqatgina doimiy kasalimiz — hujumni yakuniga etkazish bo'yicha oqsadik. Raqibda ham ko'p vaziyat bo'lmadi, biroq imkon qadar ulardan foydalanishdi. Biz esa imkoniyatlarni ko'kka sovurdik. Ushbu o'yindan to'g'ri xulosa qilishimiz kerak. Ajoyib atmosferada Argentinaga qarshi tengma-teng o'ynadik. O'yin jihatdan olib qarasak, durang adolatli natija bo'lardi. 

Vaqti-vaqti bilan raqib yo'lini to'sdik. Yakkakurashlarda ham raqibga ko'p imkoniyat bermadik. Raqibning mahoratli futbolchilari o'yin taqdirini hal qilib qo'yishdi. To'g'ri, natija jamoaga salbiy tasir o'tkazadi. Biroq bu borada tushuntirish ishlari amalga oshiramiz. Oldinda yana ikkita o'yin bor. Yigitlarni keyingi o'yinga tayyorlashga harakat qilamiz. 

O'yinni tahlil qilib chiqamiz. Xatolarimizni o'rganamiz va shunga qarab maydonga kimni tushirish haqida xulosa chiqaramiz. 

Guruhdagi narigi uchrashuvni tahlilchi murabbiylar to'liq kuzatib borishdi. Men bellashuvning bir qismini ko'rdim, shu bois butun o'yinga baho bera olmayman. Biroq xulosalarim jamoalar kuchliligidan dalolat berib turibdi. 

Jamoada kimnidir ajratib ko'rsata olmayman, butun jamoani etirof etishim mumkin. Ular bor imkoniyatini ishga solishdi. Qolaversa, zaxiradan maydonga tushgan o'yinchilar ham o'yinni kuchaytirdi. 

Abdurazzoqovda so'nggi daqiqalarda imkoniyat yuzaga keldi. U to'g'ri ochildi, zarba yo'llashni uddaladi, ammo aniqlik etishmadi.

Xoldorxonovda hech qanday muammo yo'q. SHunchaki, asosiy hujumchimiz ekanligini sezgan holdan uni raqib himoyachilari yaxshi qo'riqlashdi", dedi terma jamoamiz bosh murabbiyi.