Ravshan Haydarov: "Kam gol uryapmiz, lekin biz yarim finaldamiz"

"Jahon chempionatiga chiqqan barcha terma jamoalarni tabriklayman! Stadionni to'ldirib, yigitlarga kuch berib turganlar muxlislarga rahmat aytaman. Yigitlarga matonat ko'rsatgan, tarbiyalagan ota-onalari, murabbiylariga minnatdorchilik bildiraman. Oldimizda qo'yilgan birinchi katta vazifani bajarganimizdan xursandmiz. 

Albatta, o'tgan o'yinda ko'p kuch va hissiyotlarni yo'qotdik. Bu g'alaba harakatlarga arziydi. Koreya Respublikasi bilan ham shiddatkor va qiziqarli o'yin bo'lishi shubhasiz. SHunday xarakterdagi o'yinga tayyorgarlik ko'rmoqdamiz", – dedi Ravshan Haydarov. 

"Barchani Jahon chempionati yo'llanmasi bilan tabriklayman. Oldindagi maqsadimiz esa – chempion bo'lish. SHu yo'lda harakat qilyapmiz", – dedi Po'latxo'ja Xoldorxonov.

- O'tgan musobaqalarda futbolchilarning darajasi bir-biriga yaqin bo'lgan va nisbatan sizga osonroq edi. Bugun Abbos Fayzullaev, Umarali Rahmonaliev, Po'latxo'ja Xoldorxonovni aytmaganda, qolganlar hali u darajaga chiqqani yo'q. Bu omil sizga qiyinchilik tug'dirmayaptimi?

- Sizni ko'rishingiz bo'yicha shunday bo'lsa kerak. Qolgan futbolchilarning darajasi terma jamoaga mos, shu uchun taklif qilganmiz. Umarali, Po'lat, Abbos klubda ertaroq maydonga tushgani uchun ko'ringan.  Qolgan futbolchilarning darajasi past, degan fikrdan yiroqman. 11 nafar darajasi yuqori futbolchi bo'lgani bilan jamoaviy o'yin bo'lmasa qiyin. Futbolchilardan jamoaviy o'yinni talab qilamiz.

- O'zbekiston ham, Koreya Respublikasi ham guruh bosqichida 1 ta to'p o'tkazdi. Raqibimiz shu vaqtgacha 9 ta, biz 4 ta gol urdik. Sermahsullik Koreyada ancha yaxshiroq. Bu ertaga muammo tug'dirmaydimi?

- Jamoa yutishi uchun gol urishi kerak. Yigitlar harakat qilyapti. O'ylaymanki, bo'lajak o'yinlarda, ertaga vaziyatlarni golga aylantirishga harakat qilamiz. Koreyaga qarshi ikkinchi raqam ostida o'ynashmoqda. Baquvvat hujumchilar, tezkor yarim himoyachilar gollar yaratishdi. Gollarimiz kam, ammo biz yarim finaldamiz. 

Murabbiyning fikrlaridan so'ng Po'latxo'ja Xoldorov yana so'z oldi va quyidagilarni aytib o'tdi:

"Hozir hammasi ajoyib. O'tgan bahsda muxlislar stadionda ajoyib muhit yaratildi. Keyingi o'yinlarda ham ishqibozlarni kutib qolamiz. Bu biz uchun bosim yuklamaydi, aksincha, kuch beradi. Koreya – kuchli terma jamoa. Ularning kuchli va kuchsiz taraflarini o'rganib chiqqanmiz. Murabbiylar shunga yarasha taktika tanlashyapti".