Rasman: "Al Nasr" Doston Hamdamovni boshqa jamoaga ijaraga berdi

Ikki hafta ilgari erkin agent hisoblangan Doston Hamdamov bilan 1,5 yillik shartnoma imzolagan "Al Nasr" O'zbekiston terma jamoasi futbolchisini chempionat autsayderiga ijaraga berdi.

Malumotlarimizga ko'ra, chempionatda ikki o'yin va kubokda bir bahsda maydonga tushgan hamda hech bir uchrashuvda to'liq o'ynamagan Hamdamovning harakatlari jamoa bosh murabbiyi xorvatiyalik Yurchich Krunoslavga maqul kelmagan. SHu bois klub Hamdamovni mavsum yakuniga qadar amirliklar chempionatida autsayder bo'lgan "Hatta"ga ijaraga berdi. Bu haqda "Hatta" klubi rasman elon qildi.

Eslatib o'tamiz, "Al Nasr" klubi kuni kecha Obeid transferini elon qilib, futbolchini Hamdamovning o'rniga ro'yhatdan o'tkazishini malum qilgandi.

Hamdamovning yangi jamoasiga aylangan "Hatta" BAA chempionatida 14-turdan keyin atigi 2 ochko bilan eng oxirgi pog'onani band etib turibdi. Jamoa 14 o'yinda atigi 7ta gol urgan xolos. Klub Hamdamovdan oldin ikki futbolchi va bugun Hamdamov bilan birgalikda yangi 4 futbolchi transferini elon qildi. Jamoaga Nahir Besara, Darveesh Ahmed, Doston Hamdamov, Miral Smarjich, Ayman Achoq va Aniss Karimi kelib qo'shildi.

Etiborli tarafi, O'zbekiston chempioni "Paxtakor"ning ikki sobiq futbolchilari, qanot vingerlari Jaloliddin Masharipov va Doston Hamdamov yangi mavsumda legionerga aylanishdi hamda 2021 yilda ikkita jamoani almashtirishga ulgurib, ijarachi maqomida yangi mavsumni davom ettiradigan bo'lishdi. Masharipov Saudiyaning "Al Nasr" klubiga transfer qilinib, klubning legionerlar borasidagi taqiqi tufayli BAAning "SHabab Al Ahli" jamoasiga ijaraga berilgan bo'lsa, Hamdamov tekinga BAAning "Al Nasr" klubiga o'tib, keyinchalik chempionat autsayderi "Hatta"ga ijaraga berildi.

O'tgan yillar bir jamoada o'ynab chempionga aylangan va O'zbekistondagi barcha sovrinlarni yutgan bu ikkovlon endilikda BAA chempionatida o'zaro raqibga aylanishdi.