Qaysi jamoa chempion bo'lishi, qizil kartochkalar, belgilanmagan penalti - Mirjalol Qosimovning "Nasaf"ga qarshi o'yindan keyingi fikrlari

- Bu ikki jamoa uchun ham muhim o'yin edi. Ikkala jamoa ham g'alaba uchun maydonga tushgandi. Durang o'ynashdi. Ikkala bo'lim ham muxlislrbop jangovar futbol bo'ldi. "Nasaf" ham biz ham yutib ketishimiz mumkin bo'lgandi. Bunday o'yinlar bilan futbol yutadi.

- AGMK ochko oldimi yoki yo'qotdi?

- Boya aytganimdek, ikkala jamoa ham yutishi mumkin bo'lgandi. Bu futbol. Buni ortga qaytarib bo'lmaydi.

- Futbolchilaringiz oldiga qo'yilgan vazifani qanchalik darajada bajara oldi?

- Hali buni hisoblab chiqmadik. Bu ustida ishlaydigan taxlilchilar bor, kim qancha yugurdi, kim qancha to'p yo'qotdi. Hisoblashadi. Bunday o'yinlarda futbolchilar 100 foiz yugurishi kerak bo'ladi.

- AGMK mavsum boshida chempionlik haqida o'ylayotgandi. Biroq jamoa so'nggi o'yinlarning bir nechtasida mag'lub bo'ldi.

- Futbol qiziq narsa. Gapirsam bahona deysizlar. SHuning uchun indamay qo'ya qolay. "Olimpik" bilan qizil kartochkalar pand berdi. Birinchi turda qizil, "Olimpik" bilan qizil, keyin yana "Metallurg" bilan qizil kartochka. Birinchi bo'limdayoq 10 kishi bo'lib o'ynash juda qiyin. SHu sababdan bu bahona bo'lib qolishi kerak emas. Bu futbolning bir qismi. Undan tashqari, qisqa-qisqa tatillardan keyin o'yin ham chiqmay qoldi. "Olimpik" bilan o'yin, keyin "Nasaf"ga qarshi o'yinda 2:1 hisobida yutib turib, gol o'tkazib yubordik. "Navbahor" bilan ham yomon o'ynamadik. O'sha bahslarda ham g'alaba ishtiyoqida o'ynadik. SHu sababli hujumga berildik, bunday paytda himoya zaiflashadi. Nima ham derdik. Barchasi oldinda. Ochkolarni kuzda sanaymiz.

- Siz tajribali murabbiylardansiz. Ushbu mavsumda kim chempion bo'ladi deb o'ylaysiz?

- Bashorat berishni istamayman. Ammo chempionat tugaganidan keyin o'zimning fikrimni shaxsan o'zingizga aytaman. Ungacha hech kimga aytmayman.

- Belgilanmagan penalti haqida nima deysiz?

- Penalti yo'q edi. Buni 5 metrdan bosh hakam ham ko'rgani uchun xushtak chalmadi.