Pul muhim emasligi, "Yuventus"dagi kumirlari, Mino haqida - De Ligt nima uchun "keksa sinora"ni tanlaganini aytdi

"Italiya haqida o'ylasang, miyadan ilk navbatda himoyachilar gavdalanadi. Futbol tarixidagi eng kuchli italiyalik himoyachilar Barezi, Maldini, Kannavaro va Nestaning o'yinlaridan doimo zavq olganman.

7 yoshligimda olgan "Yuventus" libosi uyimda hali ham saqlanib qolingan. O'shanda men "Yuventus"da o'ynashni orzu qilgandim.

SHuningdek, Buffon, Kellini va Krishtianu Ronaldu kabi futbolchilar mening oldinga jiddiy qadam tashlashim uchun katta yordam berishadi. Ularning katta tajribasi bor va men ulardan ko'p narsalarni o'rganishga harakat qilaman.

Transferlar borasidagi mish-mishlarga etibor bermaslikka harakat qildim. Ayrim pallalarda ular meni biroz ajablantirdi. Eng ajoyibi - mening PSJga o'tishim borasidagi xabar bo'ldi.

Mino bilan gaplashganimda barchasi Millatlar ligasidan keyin hal qilinishini aytdi. Unga "Yuventus"ga o'tishni istayotganimni aytganimdan keyin u ishlarni boshlab yubordi. Ammo mening transferimda pullar hech qanday ahamiyat kasb etmaydi.

Mino - mening agentim. U har doim men haqimda qayg'uradi. Klubning taklifini qabul qilganimdan keyingina menga maoshim haqida gapirishdi", - dedi De Ligt.