"Paxtakor" tezlikni olib oldi, Qarshida haqiqiy jang ko'ramiz" - Superliga 9-turi oldidan mutaxassis fikri

Anvar G'ofurov, Kamoliddin Murzoev, Abdumajit Toirov avvalgi turlarda o'z taxminlarini bildirishgandi. 9-tur arafasida esa o'z davrining top-hujumchilaridan biri bo'lgan sobiq futbolchi Baxtiyor Hamidullaevga yuzlandik. 

"Buxoro" - "Metallurg"

- Ulug'bek Bakaev kelganidan keyin  "Buxoro" o'yini yaxshi tomonga o'zgarishni boshladi. Bekobodliklarda esa "Andijon"dan uchralgan yirik hisobli mag'lubiyatdan keyin o'zlarini oqlash uchun imkoniyat. Lekin, menimcha, bu o'yinda "Buxoro"ning qo'li baland keladi. 

"Andijon" - "So'g'diyona" 

- Teng kuchli jamoalar to'qnashuvi desak bo'ladi. "So'g'diyona" yangi murabbiy bilan ochko olishni boshladi. SHunga qaramay, baribir "Andijon"da tashabbus ko'proq bo'lsa kerak.  

"Bunyodkor" - "Olimpik"

- "Bunyodkor"ga g'alaba ko'proq kerak deb o'ylayman. Agarda bu o'yinda g'alaba qozonmasa, yuqori o'rinlar uchun kurashishda raqobatchilari "Paxtakor", "Navbahor", "Neftchi"dan uzoqlashib ketadi. G'alabaga ko'proq harakat qilishini hisobga olsak, biroz ustunlik "qaldirg'ochlar" tomonida bo'ladi. 

"Turon" - "Paxtakor"

- Ortda qolayotgan jamoaga istalgan raqibga qarshi maydonga chiqish ikki karra masuliyat yuklaydi. "Paxtakor" esa tezlikni olib oldi. Katta ehtimol bilan Toshkent klubi ortga g'alaba bilan qaytsa kerak. 

"Surxon" - "Neftchi"

- Bu uchrashuvda tashabbus "Neftchi" tomonida bo'ladi. Farg'onaliklar etakchilar qatoridan chiqib ketmaslik uchun ham bor kuchini ishga soladi. 

"Nasaf" - "Navbahor"

- Turning markaziy o'yini, Qarshida haqiqiy jang kechishi shubhasiz. Fikrimcha, imkoniyatlar – 50/50. 

OKMK - "Qizilqum"

- Turnir jadvalini olib qaraganda ham OKMKda imkoniyat ko'proq. Katta ustunlik olmaliqliklar tomonida bo'ladi.