O'zbekiston U-17 terma jamoasi ustozi Islom Ismoilov Paragvay, Panama va Irlandiyaning kuchli jihatlari haqida aytdi

Qura marosimidan so'ng jamoa bosh murabbiyi Islom Ismoilov musobaqa va raqiblar haqida fikrlarini bildirib o'tdi.

"Har uchala raqib ham o'z mintaqasining kuchli vakillari sanaladi va bu turnirga munosib tarzda yo'l olishgan. Shu bois har bir o'yinga alohida va puxta tayyorgarlik ko'ramiz. 

Paragvay — Janubiy Amerikaning jismoniy kuch, intizom va texnika uyg'unligi bilan ajralib turadigan jamoasi. Ular hech qachon kurashdan chekinmaydi. Panama esa KONKAKAF mintaqasida yildan-yilga o'sib kelayotgan futbol maktabiga ega. Ularning o'yin uslubi tezlik, qarshi hujum va yuqori pressingga asoslangan. Irlandiya klassik Evropa futboli vakili bo'lib, kuchli shakllangan o'yin va intizomi bilan ajralib turadi. 

Shubhasiz, guruhdagi barcha jamoalar kuchli. Bu bosqichda oson raqib yo'q. Ammo biz ham Osiyo chempionlari sifatida ushbu musobaqada shunchaki ishtirok uchun emas, balki istalgan jamoaga qarshi raqobat ko'rsatish, o'z salohiyatimizni namoyon etish va yurtimiz nomini munosib himoya qilish uchun harakat qilamiz.

Jamoamizda ishonch bor, so'nggi yillarda katta tajriba orttirgan, bir qator og'ir bahslardan o'tgan va endi har bir o'yinga chuqur tahlil, aniq reja hamda yuksak ruhiy tayyorgarlik bilan chiqadi. Bor etiborimizni raqiblarni chuqur o'rganishga, iqlim va muhitga moslashishga, shuningdek, futbolchilarimizni ruhiy va taktik jihatdan eng yuqori darajada tayyorlashga qaratamiz. Yurtimiz bayrog'ini jahon miqyosida yuqori ko'tarish va futbol muxlislariga quvonch ulashish biz uchun sharafdir", – deya takidladi Islom Ismoilov.

Avvalroq O'zbekiston U-17 Jahon chempionati "J" guruhidan joy olgani malum bo'lgandi. Bugun malum qilinishicha, o'zbekistonlik o'smirlar iyun oyida Janubiy Amerikada yig'in o'tkazadi va u erda Chili va Boliviya terma jamoalariga qarshi maydonga tushadi.