Oliy Liga: To'purarlar orasida kurash qanday kechmoqda?

SHu paytga qadar milliy chempionatimizda jamoalar 18 tadan uchrashuv o'tkazishga ulgurishdi. Quyida ayni paytda to'purarlar bahsida kimlar etakchilik qilayotgani xususida malumot berib o'tamiz.

Takidlash joizki, “Lokomotiv” hujumchisi Marat Bikmaev mavsum boshidanoq to'purarlar “poygasi”da yakkapeshqadamlikni qo'lga olgandi. Marat ilk turlardanoq ketma-ket gollar urib, o'z hisobidagi gollar sonini anchaga etkazib olgandi. Biroq futbolchi birinchi davra so'nggiga kelib jarohat oldi va bir nechta uchrashuvni o'tkazib yuborishga majbur bo'ldi. SHunday bo'lsa-da, milliy terma jamoamiz azosi ikkinchi davraning ilk o'yinlaridanoq yana o'zining to'purarlik salohiyatini namoyish eta boshladi.

Hozirda Marat Bikmaevning kiritgan gollari soni 16 tani tashkil etmoqda. SHu o'rinda qayd etish joizki, “Lokomotiv”ning penaltilar tepish borasida etakchi “mutaxassisi” vazifasini qoyilmaqom tarzda uddalab kelayotgan Bikmaev 16 ta golning 5 tasini 11 metrli jarima zarbasida kiritgan.

 

To'purarlar bahsida Bikmaevning eng yaqin taqibchisi – “Nasaf” hujumchisi Dragan CHeran sanaladi. U hozirga qadar 10 bor raqiblari darvozasini ishg'ol etgan. “So'g'diyona” azosi Sanjar Rashidov esa 9 bor muvaffaqiyat qozongan.

SHuningdek, 3 nafar futbolchilar – Ilhom Yunusov, Zohid Abdullaev va Ivan Nagaev 7 martadan gol urishga erishishgan.

6 bor raqib darvozabonlarini hafa qilgan ijrochilar orasida “Lokomotiv”dan Murod Bobojonov ham bor. “Temiryo'lchilar”dan Jaloliddin Masharipov 5 marta to'p kiritgan.

 

Jamoamiz sardori Temur Kapadze, Ikrom Aliboev hamda Sardor Mirzaev 3 martadan gol urishga muvaffaq bo'lishgan.

“Loko” vakillaridan Islom To'xtaxo'jaev, Sadriddin Abdullaev, Diyor Turopov, Kaxi Maxaradze, Salamat Qutiboev, Aziz Amonov va Oleg Zoteevlar 1 martadan muvaffaqiyat qozonishgan.

Umumiy hisobda “Lokomotiv” futbolchilari 43 marta raqiblari darvozalarini ishg'ol etishgan. Bu borada ham “Lokomotiv” yakkapeshqadam bo'lib turibdi. Jamoamizda to'plar nisbati +31ni tashkil etmoqda.

 

Diqqatga sazovor jihati shundan iboratki, “Lokomotiv”dan tashqari faqatgina “Buxoro” 30 marta gol urgan. Boshqa hech bir jamoa hozircha 30lik dovondan oshgani yo'q.