Oliy liga. 19-tur. “Navbahor” safardagi g'alabasiz seriyaga barham beradimi?

16:00. “So'g'diyona” - “Navbahor”

Turnir jadvalida 13-o'rinda borayotgan “So'g'diyona” o'z maydonida “Navbahor”ni qabul qiladi. Kecha bo'lib o'tgan har ikkala jamoaning o'rinbosarlari bahsida “Navbahor” yoshlari 3:0 hisobida g'alaba qozonishdi. Xo'sh, bugungi o'yinda ham “Navbahor”ning asosiy tarkibi o'zini ko'rsata oladimi yoki “So'g'diyona” o'z maydonida raqibga imkon qoldirmaydimi?

Ikkinchi davra boshlanganidan beri “So'g'diyona” faqat bir marta g'alaba qozondi. Yani, Davron Fayziev shogirdlari safarda “Dinamo”ni engib qaytishdi. Jamoa o'z maydonida “Olmaliq” bilan durang o'ynadi va qolgan uch bellashuvda yutqazib qo'ydi.

“Navbahor” esa beshta o'yindan ikkitasida zafar quchdi. Jamoa har ikkala g'alabani o'z maydonida qo'lga kiritdi. Safardagi uchta bahsda namanganliklar faqat mag'lub bo'lishdi. Bugun esa jamoa safarda to'rtinchi o'yinini o'tkazadi va bunda “Navbahor”ga yana oson bo'lmasa kerak. Negaki jamoa bugungi o'yinini bosh murabbiysiz o'tkazadi. CHunki Baxtiyor Ashurmatov terma jamoamiz bilan Osiyo o'yinlariga jo'nab ketgan.

Bu ham o'ziga yarasha yo'qotish hisoblanadi albatta. To'g'ri, jamoada Mustafo Bayramov bilan Zohid Nurmatov kabi yordamchilar bor, lekin baribir zamonaviy futbolda bosh murabbiyning o'rni katta. Oliy ligadan tushib ketishi mumkin bo'lgan “So'g'diyona” uchun bu o'yin judayam muhim. O'z navbatida “Navbahor” ham qarab turmasa kerak.

X.Xoliqov.