"Navbahor": "Buxoro" mag'lub etildi

Toshkentda olib borilgan tayyorgarlik jarayonining so'nggi kunida Rashid G'ofurov shogirdlari "Buxoro" klubi bilan o'zaro kuch sinashishdi. 90 daqiqa davomida o'yin erishilgan ustunlik yakuniy hisobda ham o'z aksini topdi. Uchrashuvning birinchi bo'limida "lochinlar" hisobni ochishga muvaffaq bo'lishdi. Nodir Mavlonov o'z nomiga gol yozdirib qo'ydi. Takidlash lozimki, hisob ochilgach raqib 11 metrli jarima zarbasini tepish imkoniga ega bo'lgandi. Ammo, darvozabonimiz Akmal Ortiqov penaltini qaytarishga muvaffaq bo'ldi. Bellashuvning birinchi yarmi 1:0 hisobida yakunlandi.

Ikkinchi bo'limda Azam Aliev hisob 2:0 ko'rinishga ega bo'lishini taminladi. O'yin oxirlarida raqib "Navbahor" darvozasini ishg'ol etib, hisobni qisqartirishni uddaladi. 2:1 hisobi bellashuv oxirigacha saqlanib qoldi.

SHu tariqa "Navbahor" Toshkentdagi yig'inning so'nggi nazorat uchrashuvida g'alabani qo'lga kiritdi.

"Navbahor" bellashuvni quyidagi tarkibda boshladi: Akmal Ortiqov, Obid Jo'raboev, Dilshod Jabborov, Xayrullo Karimov, Aziz G'ulomxo'jaev, Azam Aliev, Nodir Mavlonov, Akram Baxritdinov, Anvar Rajabov, Viktor Karpenko, Oleksandr Pishur.