Mirjalol Qosimov: "Dastlabki vazifa bajarildi"

“Musobaqa boshlanishidan oldin guruh favoriti edik, bu o'z tasdig'ini topdi. Afg'oniston birinchi bo'limda qarshilik qilishga urindi, ammo biz kuchli ekanimiz ko'rinib turgandi. Bugungi o'yindan so'ng o'z oldimizga qo'yilgan dastlabki vazifani bajardik, yani guruhda birinchi bo'ldik”, - deb gap boshladi Qosimov.

- Bugun o'tgan turlarda kam o'ynagan himoyachilarni maydonga tushirdingiz. Saudiya Arabistoniga qarshi o'yindan oldin asosiy kuchimiz bo'lgan yarim himoyachilarga dam bersa yaxshi bo'lmasmidi?
- Bugun o'yin boshidan bunday qila olmasdim. Tanaffusda Sardor Rashidov va Fozil Musaevni almashtirdim. Ularda sariq kartochka ham borligi bunga sabab bo'ldi. Bundan tashqari Islom To'xtaxo'jaevga ham dam berishga qaror qildim. Barcha yigitlarga imkon qadar bir xil o'yin vaqtini berishga harakat qilayapmiz.

- Afg'oniston bizga qarshi ochiq o'ynadi. Guruhdagi uchta o'yin ichidan eng qiziqarlisi bo'ldi deya olasizmi?
- Gollar borasida albatta qiziqarli bo'ldi. Raqibimiz guruhdan chiqish imkoniyati yo'qligi uchun erkin o'ynashdi. SHu sababli ham hujumlarga ham o'tib turishdi. Biz esa keyingi bosqichga chiqish uchun kurashayotgandik. Har bir gol bizga qimmatli edi. Bugungi o'yin Saudiya Arabistoniga qarshi o'yinga tayyorgarlik vazifasini ham o'tab berdi deb o'ylayman. Xudo xohlasa 26 sentyabr kuni Saudiya Arabistoniga qarshi munosib qarshilik ko'rsatib g'alaba qozonishga umid qilaman.

Nodirxo'ja Yuldashev
Incheon