Migel Alvares: "Boshqa murabbiylarning uslubiga ahamiyat bermayman, chunki mening o'z qo'llanmam bor"

O'yin haqida

— Avvalambor "Bunyodkor" klubini ushbu g'alaba bilan tabriklayman. Ular juda yaxshi jamoa. Qolaversa, klub o'z akademiya tarbiyalanuvchilari bilan yaxshi natijalarga erishmoqda. O'yinga to'xtaladigan bo'lsak, birinchi bo'lim teng kurashlar ostida o'tdi. Ikkinchi bo'limda esa biz yaxshiroq harakat qildik. Ammo hisob borasida raqibdan ortda qoldik. SHunga qaramay, shogirdlarimga minnatdorchilik bildiraman. Ayniqsa, muxlislarga alohida rahmat aytaman. Ular uzoq yo'l bosgan holda stadionga tashri buyurib, bizni qo'llab-quvvatladi. 

— "Surxon" o'yin tempi, hujumlar tashkil etish borasida "Bunyodkor"dan ortda qolmadi. Bu jarayonga qay darajada tayyorgarlik ko'rilmoqda? Jumladan, sizning qo'l ostingizda jamoa pozicion hujumlar qilishni ko'paytirib, o'yin uslubini o'zgartirdi...

— Jamoaga kelgach, mashg'ulotlar qo'llanmasini o'zgartirgandim. Men boshqa murabbiylarning uslubiga ahamiyat bermayman, chunki mening o'z qo'llanmam bor. SHogirdlarimning pozicion va hujumkor o'yin namoyish etishi uchun harakat qildim. Menimcha, muxlislar oxirgi o'yinlarimizdan rohatlanmoqda. SHunga qaramay, o'z ustimizda ishlashdan to'xtamaymiz.

— "Surxon" murabbiyi sifatida Termizdagi ishlardan xabardormisiz? Sababi, muxlislar yil davomida poytaxtga qatnagan holda klubni qo'llab-quvvatlashga majbur bo'ldi. Stadion bilan bog'liq muammolar bormi?

— Men klub menejmentida faoliyat olib bormayapman. Men jamoa bosh murabbiyi sifatida futbolni nazorat qilaman. Termizda ushbu yil o'ynay olmaymiz, chunki vaqt kam qoldi. Bilishimcha, stadionni yaxshilash borasida ishlar olib borilmoqda. Kelasi yil o'z maydonimizda o'yin o'tkazishga harakat qilamiz.