"Metallurg": Assalom futbol bahori!

O'zbekiston XXV milliy chempionati eshik qoqmoqda. 5 mart kuni respublikamizning beshta stadionida yangi mavsumning bayroqlari ko'tariladi. Bekobod shahrimizdagi “Metallurg” stadionida maydon egalari – “Metallurg” Jizzaxning “So'g'diyona” jamoasini qabul qiladi. Biz barcha futbol ishqibozlarini, “Metallurg” jamoasining fidoyi muxlislarini yangi mavsum bilan, futbol bahorining boshlanishi bilan samimiy tabriklaymiz! “Metallurg” jamoamizga esa O'zbekiston XXV milliy chempionat o'yinlarida omad yor bo'lishini tilaymiz. CHiroyli, g'alabali o'yinlaring bilan ishqibozlaringni shod et, “Metallurg”!

Bu yilgi ishtirok “Metallurg” jamoasining mamlakat chempionatlaridagi 19-mavsumi bo'ladi. Ortda qolgan chempionatlar davomida bekobodliklar jami 524 ta uchrashuvda maydonga chiqishgan. SHularning 167 tasida “Metallurg” futbolchilari g'alaba qozonishgan. 106 o'yinda kuchlar teng kelgan bo'lsa, 251 ta uchrashuvda raqiblar zafar quchishgan. Kiritilgan va o'tkazib yuborilgan to'plar farqi: 651-860. O'zbekiston chempionatlarida “Metallurg” jamoasi 607 ochko jamg'argan.

“Metallurg” O'zbekiston chempionatlari tarixidagi eng yaxshi natijani 2002 yilda qayd etgan, 30 ta o'yinda 48 ochko jamg'argan bekobodliklar musobaqa jadvalining 5-o'rinidan joy egallashgan. O'tgan mavsum esa sevimli jamoamiz 30 ta uchrashuvda 39 ochko jamg'argan holda 9-o'rindan joy egalladi.