Maydon ichida qolib ketayotgan U-20 Osiyo kubogi yoxud Toshkentda sezilmayotgan musobaqa shukuhi

OFK ketma-ket ikkinchi yil ikki yosh toifasidagi qita musobaqasini o'tkazishni O'FAga ishonib topshirdi. Tashkilot turnirni ko'ngildagidek o'tkazishga barcha imkoniyatni ishga solmoqda. Ammo, lekin, biroq deydigan jihatlar ham yo'q emas. 

U-20 Osiyo kubogi borligini biz bilamiz lekin ko'chadagi aholichi?

Haqli savol. Bu terma jamoadagi 3-4 nafardan boshqa futbolchilar hali notanish. O'z klublarida asosan o'rinbosarlar jamoalarida to'p tepib kelayotgan yigitlar. SHunday ekan ishqibozlarda etarlicha malumot yo'q. Bu musobaqa orqali yosh futbolchilarda o'zlarini tanitib olishlari imkoni bor. Lekin ko'chadagi oddiy odam ertaga turnir boshlanishini biladimi? Yo'q. CHunki Toshkentda hech qanday musobaqa shukuhi sezilmayapti. Farg'onada esa bilmaymiz. Afishalar, reklamalar, qisqasi targ'ibot etarli darajada emas. Stadion atrofida qandaydir belgilar ko'zga tashlanmayapti. Futbol bu bayram, ko'ngil yozish, hordiq chiqarish deganidir. Gap yo'q, tashkilotchilik yuzasidan tegishli xodimlar harakat qilyapti.  Ammo U-20 musobaqasi faqat maydon ichida qolib ketayotgandek ko'rinyapti. Toshkentda shunday katta turnir bo'layotganini futbolga qiziqmaydigan odam ham bir qarashdayoq payqashi lozim. 

CHiptalar mavzusi 

O'tgan yilgi U-23 musobaqasida muxlislarning stadionga tashrifi finalgacha bepul etib belgilangandi. O'sha paytda final o'yiniga chiqarilgan chiptalar bir kechadayoq "tuya" qilib ketilgani yodingizda bo'lsa kerak. Endilikda bu yil chipta bilan bog'liq barcha masalalar iTicket.uz orqali bo'lyapti. Sotuv ham shu platformada amalga oshirilmoqda. Eng qizig'i mazkur masalada O'FAdan aytarli aniq javob ololmadik. 

Lekin nega bu yil pullik qilib qo'yildi, degan savolga 2ta taxminiy javobimiz bor. Birinchisi avvalgi musobaqada Iroq bilan bahsdagi "ishkal"dan so'ng AFKning talabi, ikkinchisi O'FAga qo'shimcha daromad kelib tushishi. CHiptalarga kelsak, narxlari u darajada qimmat emas. 10 000 so'mdan 50 000 so'mgacha. Yana bir malumot Farg'onada "Istiqlol" stadionidagi o'yinlarga orasi yaqin bahslarga bitta chipta sotib olib 2ta uchrashuvga tushishingiz mumkin. 

Nima bo'lganda ham terma jamoa azolariga faqat omad tilaymiz.