Kim CHang Bok: "O'zbekistonda murabbiy o'zgardi, demak taktika ham o'zgargan"

"Ertangi bahs ikkala jamoa uchun ham muhim hisoblanadi. KXDR - O'zbekiston uchrashuvdan so'ng juda katta vaqt o'tdi. Bu o'yinga juda jiddiy tayyorgarlik ko'rdik. Biz mana shu tayyorgarlikni yaxshi bo'lganini isbotlash uchun O'zbekistonga keldik", - deydi KXDR bosh murabbiyi Kim CHang Bok.

- Janob murabbiy, O'zbekiston terma jamoasini qanchalik o'rgandingiz? Bahrayn va Filippinga qarshi o'yinlarning videolarini ko'rdingizmi?

- O'zbekistonning KXDRga qarshi o'yinidan so'ng terma jamoaingiz tarkibida o'zgarishlar sodir bo'ldi. Jamoaga 15, 16, 19-raqamli futbolchilar kelib qo'shilishdi. KXDRdagi bahsda asosan faxriy futbolchilar o'ynagandi. Bahrayn va Filippinga qarshi uchrashuvlarda esa ko'plab yoshlar o'ynaganini ko'rdim. Ularning kuchlari 90 daqiqaga etmoqda. Bu shaxsiy fikrim. 

- O'zbekistonning kuchli va kuchsiz tomonlarini ayta olasizmi?

- Terma jamoaning kuchli va kuchiz tomonlarini aytmagan bo'lardim. Avvalgi jamoada urg'u ko'proq maydonning markaziga berilardi. Hozir esa tezkor harakat qilib hujumga o'tishga urinmoqda. Jamoada bosh murabbiy o'zgardi, demak taktika ham o'zgargani aniq. Bundan tashqari O'zbekistonning ustunligi muxlislarda bo'ladi. Ertaga stadionga ko'plab muxlislar kelishi mumkin. Agar bunga qarshi chora topa olsak yaxshi natijaga erisha olamiz.

- Nima uchun KXDR tabiiy maydonlarga ega bo'la turib JCH-2018 saralash o'yinlarini suniy maydonlarda o'tkazmoqda. Bu raqiblarga qarshi o'ziga xos taktikami?

Bu savolga KXDR xalqaro munosabatlar bo'yicha mutaxassis janob CHe javob berdi: Bizning iqlimga tabiiy maysa to'g'ri kelmaydi. To'g'ri bizda tabiiy maydonlar bor, ammo bu stadionlar FIFA tomonidan qabul qilinmaydi. Bu suniy maydon FIFA tomonidan rasman qabul qilingan. SHu sababli ham raqiblarni Pyongyangdagi o'yingohda qabul qilayapmiz.

- Ertaga KXDRni durang qoniqtiradimi?

- Agarda biz ertaga durangga erisha olsak texnik tomondan qoniqarli natija bo'ladi. Sababi uyda O'zbekistonni mag'lub etganmiz, safarda esa durang. Bu texnik tomonlama bizga ustunlik beradi.

- Janob murabbiy, siz o'z murabbiy faoliyatingizda yangiliklardan foydalanib turasizmi yoki odatiy materiallardan foydalanasizmi?

- Raqiblarni o'rganish borasida yangi texnologiyalar bo'yicha futbol Federaciyasida shunday bo'lim bor. Asosan videomateriallar orqali raqiblarni o'rganamiz. Murabbiy o'yinlarni ko'rib o'zi taktika tuzib chiqadi. 

Narzulla Saydullaev