Ilhom SHaripov: "Muxlislarimiz "Dinamo"ning oliy ligaga qaytishini intizorlik bilan kutishgandi"

- Ilhom aka, avvalo Oliy Liga yo'llanmasi bilan tabriklaymiz. O'yinda natija yirik bo'lsada, bahs oson kechgani yo'q, shunday emasmi?

- Tabrik uchun rahmat! CHindan ham Samarqand ahli Oliy Ligaga tezroq qaytishimizni intizorlik bilan kutgandi. Mavsum yakunlanishiga uch tur qolganda oldimizga qo'yilgan eng asosiy vazifani bajarganimizdan xursandmiz. Minglab muxlislarimiz, futbolchilarimiz, bizni qo'llab-quvvatlab turgan rahbariyatimiz va klubning har bir xodimini tabriklayman.

O'yin borasida gapiradigan bo'lsam, bugun yirik hisobda g'alabaga erishgan bo'lsakda bu oson kechgani yo'q. Ikkinchi bo'limda vaziyatni o'nglab, haqli g'alabaga erishdik.

- Murabbiylik faoliyatingizni aynan Dinamo bosh murabbiyi sifatida boshladingiz va dastlabki mavsumdayoq jamoani Birinchi Liga g'olibi sifatida Oliy Ligaga olib chiqdingiz. Taassurotlaringiz qanday bo'ldi?

- Murabbiy sifatidagi ilk mavsumdan ko'nglim to'ldi. Har holda Birinchi Ligada bo'lsada, bu o'ziga xos qiziqarli, mashaqqatli bo'ldi va oldimizdagi vazifani bajardik. Men uchun yana bir muhim jihati Dinamo safini 90 foiz samarqandlik yosh futbolchilardan tashkil etganimizdir. CHempionatda jiddiy kurash kechib, beshta klub Oliy Liga yo'llanmasi uchun kurash olib bordi va yakunda marraga birinchi bo'lib etib kelganimiz juda yoqimli.

- Keyingi uchta o'yin jamoa uchun amalda hech narsani hal etmaydi…

- 5 noyabr kungi Cementchiga qarshi o'yin Samarqanddagi so'nggi o'yinimiz bo'lib, bahsdan keyin chempionatning yopilishi marosimi o'tkaziladi. SHunday ekan, muxlislarimiz qarshisida g'alaba qozonishimiz shart. Qolgan ikki o'yinimizda ham asosan yosh futbolchilarga imkoniyat bersakda, ijobiy natija uchun kurashamiz. Keyingi yil uchun ham tayyorgarlikni hozirdan boshlaymiz, jamoa safini kuchaytirish, tarkibda kimlarni olib qolish, kimlar bilan esa xayrlashish haqida o'ylashimiz kerak, futbolda busiz bo'lmaydi. So'zim yakunida shanba kungi Cementchiga qarshi o'yinimizga barcha ishqibozlarimizni taklif etib qolaman.

Dinamo Matbuot xizmati.