Igor SHkvirin: “Lokomotiv” haqli g'alabaga erishdi”

-   Avvalo “Lokomotiv”ni bugungi yutuq bilan tabriklayman, - deya so'z boshladi Igor Anatolevich. - SHuni aytishim mumkin, raqib haqli g'alabaga erishdi. “Loko” bizga nisbatan yaxshi tayyorgarlik ko'ribdi va buni amalda isbotladi. Hisob bundan-da yirik ko'rinish olishi mumkin edi. Biz negadir o'z o'yinimizni ko'rsata olmadik. Butun bahs davomida raqib darvozasi tomon nari borsa bir marta xavfli zarba yo'lladik. O'tkazib yuborilgan gollarda darvozabon xatoga yo'l qo'ydi, lekin futbol jamoaviy o'yin ekanligini unutmaylik. SHunday ekan, mag'lubiyatda butun jamoa aybdor. O'tgan yil Olmaliqda ham shu “Lokomotiv”ga yutqazganimizda darvozabon xatoga yo'l qo'ygandi va o'shanda ham Karpenko gol urgandi. Bu safar ham Karpenko to'p kiritishga muvaffaq bo'ldi, ammo boshqa darvozabonga.

-   Maqsadmurod SHomurodov nima uchun darvozani qo'riqlamayapti?
-   Avvaliga u jarohat olgandi, keyin uyiga borib davolanib keldi. U bugungi uchrashuvga tayyor edi, biroq murabbiylar shtabi bilan kelishgan holda Umid Xonimqulovni tanladik.

-   Sanjar SHoahmedovni nima sababdan birinchi taymdan so'ng almashtirdingiz? Bu uning terma jamoada o'ynagani bilan bog'liqmi?
-   CHunki u o'zidan kutilgan o'yinni umumaan namoyish eta olmadi. Sanjar o'tgan yilgi o'yinlarining hatto 50 foizini ham ko'rsatmayapti. Biz uni bir yildan beri terma jamoa bosh murabbiyiga tavsiya qilib kelyapmiz. Ammo terma jamoaga chaqirildi deguncha o'yinida pasayish yuzaga kelyapti. SHoahmedov bugun aslida zaxiradan joy olishi kerak edi, lekin o'yin boshlanishiga oz vaqt qolganida Darko Stanoevichning to'satdan qorni og'rib qoldi. Natijada Sanjarni majburan asosiy tarkibga kiritdik.

X.Xoliqov yozib oldi.