Diyor Imomxo'jaev: "Bazida haykallar tupurib o'tish uchun ham kerak"

Eron milliy terma jamoasi biz allaqachon qilishimiz kerak bo'lgan ishga 6,5 yil avval qo'l urib, zamonaviy fikrlaydigan va katta futbol ko'rgan mutaxassisni olib kelgandi. Endi Keyrush jamoasini engish qita etakchilari uchun ham oson ish emas.

Janubiy Koreyada futbol strukturasi qanday ekani haqida barchamiz yaxshi bilamiz. Mamlakat bosh jamoasi ancha kuchsizlanib qolgan bo'lsa-da, toki O'zbekiston kabi jamoalar bor ekan, ular muntazam ravishda JCHga boraveradi. Aytmoqchimanki, ish to'g'ri yo'lga qo'yilishi eng asosiy mezon. Biz esa noto'g'ri yo'ldan yurayotganimizni bilib turib, muvaffaqiyat kutadiganlar xilidanmiz.

Vatanparvarlik borasinda TVdagi chiqishlar, shoirlarning balandparvoz gaplari-yu, shuhratparastlarning shishirilgan fikrlari qancha ko'p bo'lmasin, asl vatanparvarlik ko'rinishlarini biz Suriya misolida ko'rdik. Umid qilamanki, buni o'sha gaplari qilayotgan amallariga to'g'ri kelmaydiganlar ham ko'ra olishdi.

Samvel Babayan milliy terma jamoani qabul qilib olganidan so'ng uning xatolari va qarorlarini eng ko'p tanqid va tahlil qilganlardan bo'ldim. Endi bu ishni davom ettirishdan mani yo'q, men to'xtadim, men mag'lub bo'ldim, mening jamoam yana o'sha-o'sha qolib ketganlar qatorida, bizning muxlislar doimgidek alamini ichiga yutganlar qatorida. CHunki vaziyatni o'nglash hech birimizning qo'limizdan kelmadi, biz ojizmiz, kichik odamlarmiz, katta ishlarga aqlimiz etmaydi.  

Faqat bir gapni aytaman, qadrdonlar, ikki yil davomida ustimizdan kulishdi. Oramizda buni sezmaganlar, his qilmaganlar yoki qo'shilib kulganlar bo'ldi. Ich-ichimdan hafaman. Ko'rishguncha, ko'ngli yarimta do'stlarim...