“Bunyodkor” “Neftchi” safida U-18 jamoalari o'rtasida O'zbekiston chempioni bo'lgan futbolchilar va murabbiy bilan shartnomalar imzoladi

 Farg'onaning “Neftchi” U-18 jamoasi tarkibida 2021 yilgi mavsumda O'zbekiston chempionligiga erishishgan 4 nafar futbolchi va murabbiy o'zlarining keyingi taqdirlarini “qaldirg'ochlar” bilan bog'lashdi. “Neftchi” U-18 jamoasiga oltin medallarni keltirgan bosh murabbiy Aziz Alijonov hamda futbolchilar Muhammadali Xolmatov, Humoyun Bozorboev, Oblayorbek Rahmatov va Odiljon Nabiev har biri “Bunyodkor” klubi bilan 3 yilga mo'ljallangan professional mehnat shartnomasiga imzo chekishdi.

Takidlab o'tish joiz, M.Xolmatov va O.Rahmatov yaqinda, 6-15 dekabr kunlari tashkil etilgan O'zbekiston U-18 yoshlar terma jamoasining o'quv-mashg'ulot yig'inida qatnashgan edilar.

“Futbol ishqibozlariga o'zining o'yinchilik davridan buyon judayam yaxshi tanish Aziz Alijonov U-21 yoshlar jamoamiz murabbiylar shtabiga qo'shiladi. Kelajakdagi rejalarimizni batafsil bayon etganimizda, menimcha, ular yosh mutaxassisga manzur keldi.

“Neftchi” safida 2021 yili o'z yosh toifalarida chempionlikni qo'lga kiritgan yosh iqtidorlarni jamoamizga olib kela olganimizdan xursandmiz. Ishonamizki, qisqa vaqt ichida ular asosiy jamoa eshiklarini zabt etishadi. Biz har doim asosan yoshlarga etibor qaratamiz. Mavsum startiga qadar tarkibimizga yana boshqa bir qancha talantli futbolchilarni jalb etishni mo'ljallaganmiz”, - dedi yangi futbolchilar bilan shartnomalar imzolash chog'ida “Bunyodkor” futbol klubi direktori Ulug'bek Mirzaev.