“Bunyodkor-2001” Rossiyadagi turnirni g'alaba bilan boshladi

“Rubin” futbol klubi tashabbusi bilan tashkil etilayotgan ushbu turnir jamoa safida 2003-2007 yillari to'p tepgan, 2005-2007 yillar mobaynida Rossiya yoshlar terma jamoasi sardori sifatida harakat qilgan, bu yorug' olamni 22 yoshida tark etgan qozonlik Lenar Gilmullin xotirasiga bag'ishlab o'tkazilmoqda.

Turnirda jami 6ta jamoa ishtirok etmoqda. Bular: “Krasnodar” (Rossiya), “Qayrat” (Qozog'iston), “Dinamo” (Belorus), “Bunyodkor” (O'zbekiston), “Rubin” (Rossiya) va “Zimbru” (Moldaviya).

Musobaqaning birinchi uchrashuvida “Bunyodkor” va Minskning “Dinamo” futbol maktabi tarbiyalanuvchilari kuch sinashdilar. Qiziqarli kechgan bahsda yosh “qaldirg'ochlar” raqibni irodali tarzda 2:1 hisobida mag'lubiyatga uchratdilar. Uchrashuvning 10-daqiqada Mixail SHevchenko tomonidan kiritilgan gol belorussiyaliklarni oldinga olib chiqqandi. Ikkinchi bo'limda futbolchilarimiz tashabbusni o'z qo'llariga olishdi va “Dinamo” darvozasiga ikkita to'p kiritishdi. Gollarga Xumoyun Ismoilov va Sirojiddin Bashriddinov mualliflik qilishdi.

“Bunyodkor-2001” futbolchilari ertaga 2-tur doirasida musobaqa mezbonlari “Rubin” jamoasiga qarshi saf tortishadi. Uchrashuv Toshkent vaqti bilan soat 15:00da boshlanadi.