Bugun futbol. "Navbahor" - "Neftchi"

Muxlislar bugun Namanganda vodiy derbisi guvohi bo'lishadi. O'z oldiga chempionlik maqsadini qo'ygan "Navbahor" g'alabali odimini davom ettirish uchun "Neftchi"ga qarshi bahs olib boradi.

Musobaqa jadvalida "Navbahor" 8 o'yinda 16 ochko to'plab birinchi o'rinda bormoqda. To'plar nisbati 10-6. "Neftchi" esa 5 ochko to'plagan holda oxirgi o'rinni egallab turibdi. Farg'onaliklarda to'plar nisbati 4-11. Demak, bugun Namangandagi Markaziy stadionda peshqadam va autsayder o'rtasidangi "jang" guvohi bo'lamiz.

Bilasizmi? "Neftchi" qatorasiga 7ta o'yindan beri g'alaba nimaligini bilmay kelmoqda. Jamoa o'zining yagona g'alabasini ilk turda "Qo'qon-1912" ustidan qo'lga kiritgan. SHundan so'ng Ilhom Mo'minjonov shogirdlari ikki bor durang o'ynab, beshta uchrashuvda mag'lubiyatga uchrashdi. 

"Navbahor" o'z maydonida "So'g'diyona"ga imkoniyatni boy berib qo'yganidan so'ng ketma-ket uch o'yinda g'alaba qozondi. Namanganliklar oxirgi uch turda "Qizilqum", "Bunyodkor" va "Dinamo"ni mag'lub etishdi.

Bugungi bahsda "Navbahor"ning imkoniyatlari yuqori ko'rinmoqda. Birinchidan, jamoa o'z maydonida o'ynaydi, ikkinchidan "Navbahor" - turnir jadvali peshqadami va tarkibi ham kuchli. 

Lekin o'z navbatida "Neftchi" ham qarab turmasa kerak. CHunki farg'onaliklarga g'alaba suv va havodek zarur.

17 may, seshanba. 19:00

NAVBAHOR – NEFTCHI

Hakamlar: Firdavs Norsafarov, Sardor Nishonboev, Baxtiyorxo'ja SHavkatov, Husan Muzaffarov

Nazoratchi: Timur Abdullaev

Komissar: Qudrat Madraimov