Bu - futbol emas, cirk!

"Surxon-W" qizlari birinchi davrada "Sevinch"ga 0:29, "So'g'diyona-W" bilan o'yinda esa 0:35 hisobida mag'lub bo'lgandi. Kecha o'tkazilgan "So'g'diyona-W" bilan kechgan ikkinchi davra o'yinida ham 0:29 hisobida imkoniyatni boy berdi.

Birgina "So'g'diyona-W" bilan kechgan har ikkala bahsda termizlik qizlar 0:64 hisobida yutqazgan, agar "Sevinch"dan o'tkazib yuborilgan gollarni ham qo'shsak, 3ta o'yidagi to'plar nisbati 0:93 ko'rinish oladi. Dahshat!

Dahshati shundaki, bu jamoa zo'rma zo'raki, buyruqbozlik yo'li bilan tashkil qilindi. Bizga malum bo'lishicha,"Surxon-W" safida to'p tepayotgan qizlar futbolchi emas, ular aslida voleybolchi. "Surxon" selekcionerlari futbol o'ynaydigan qizlar topolmay majburan voleybolchi qizlarni ro'yxatdan o'tkazgan va ular koptok tepib yuribdi, yana O'zbekiston chempionatida qatnashyapti.

Bu o'rinda O'FAning ham aybi bor.CHunki PFL ayollar futbolini o'tkazishdan voz kechdi, aniqrog'i O'FA musobaqani o'ziga oldi. Tortib oldimi yoki boshqa yo'l bilanmi, to'liq tafsilotini bilmaymiz. SHunisi aniqki, ayollar o'rtasidagi O'zbekiston oliy ligasi, birinchi liga, Kubok, U-17 va U-14 kabi musobaqalarni O'FA o'tkazib kelmoqda.

Buning natijasida Superliga klublariga ayollar jamoasini tashkil etish majburiyati yuklangan. Kimdir o'z xohishi, kimdir buyruqni bajarish uchun qizlar jamoasini tashkil qilgan.

Masalan, "Surxon"ga ayollar jamoasi nima uchun kerak? Asosiy jamoa o'z stadioni yo'qligidan shundoq ham ikki yildan beri ijarama-ijara yuribdi. Rahbarlari ham Toshkentda. Lekin klub Superligada ekan, ayollar va futzalga ham etibor qaratishi kerak. "Surxon" futzal klubi bu yil birinchi ligadan Oliy ligaga chiqdi, shunda ham DHL havaskor futzal jamoasidan 8 nafar futzalchini ijaraga olib o'ynatdi. Lekin bu jamoa Oliy ligada ham o'ynaydimi-yo'qmi, bunisi nomalum.

Ayollar futboli bo'yicha ham muammolar etarli. Hozirgi paytda "Surxon-W" ayollar jamoasi O'zbekiston birinchi ligasida ishtirok etib kelyapti. Bu kamlik qilib qisqa furtsat ichida (aytaylik bir oy) zudlik bilan U-17 qizlar jamoasini tuzishga to'g'ri keldi. Natijada zo'rg'a voleybolchi qizlardan jamoa tuzildi va ular ko'rsatayotgan natija malum.

Endi o'zingiz o'ylab ko'rib, uchta o'yinda 93ta gol o'tkazgan jamoadan kelajakda futbolchi chiqadimi? Qizlarning futboldan ko'ngli sovib ketmaydimi? Raqib jamoalar 30talab gol urgandan ko'ra, shundog'am kuchsiz jamoani sal avaylab to'p tepgani maqul emasmi? Eng aavvalo bunga yo'l qo'yib berayotgan O'FAni nima deyish mumkin?

Masalan, men musobaqa o'tkazishga masul bo'lganimda birinchi yirik hisobdan keyinoq jamoaga rahmat aytib, turnirdan olib tashlagan bo'lardim. CHunki bunaqa cirkka chiday olmasdim. Teng kuchli jamoalar yig'ilmas ekan, musobaqa saviyasi hech qanaqasiga ortib qolmaydi.

P.S. U-17 taqvimiga ko'ra, "Surxon-W" U-17 jamoasi 29 avgust kuni yana "Sevinch" bilan o'ynaydi.

X.Xoliqov.