Bokuda Markaziy Osiyo futbol associaciyalari uchun FIFA loyihalarini amalga oshirish bo'yicha seminar o'tkazildi

11-12 dekabr kunlari O'zbekiston, Qirg'iziston, Tojikiston hamda Turkmaniston futbol associaciyalari vakillari Bokuda yig'ildilar. Ikki kunlik FIFA seminari mobaynida jahon futbol uyushmasi tashabbusi bilan o'tkaziladigan turli loyiha va dasturlar ko'lami, ularni amalga oshirishda maksimal samaradorlikka erishish, uzoq muddatga mo'ljallangan puxta rejali loyihalar orqali mamlakatda futbolni yanada rivojlantirishga, uning ommaviyligini oshirishga, shuningdek, infratuzilmani yaxshilashga erishish kabi masalalar muhokama etildi.

Mazkur seminarda O'FA Birinchi vice-prezidenti Ravshan Ermatov ham ishtirok etdi va O'zbekiston futbol associaciyasining yurtimizda futbolni yanada rivojlantirishga qaratilgan loyihalari xususida malumot berdi.

Seminar davomida FIFAning turli yo'nalishdagi loyiha va dasturlarini maqsadli amalga oshirishda Ozarbayjon tajribasi ham o'rganildi.