"Barsa" Ronaldoning transferida "Real"ga 10 mln evro tejab bergan. Bu qanday bo'lgan edi? (mutolaa uchun)

Ronaldo 2002 yilning avgust oyi so'nggida "Inter"dan "Real"ga o'tdi, bu yozgi transfer oynasining so'nggida ro'y berdi. Transfer narxi 45 mln evroni tashkil etdi, ammo Madrid klubi aslida braziliyalik uchun 10 mln evro kamroq to'ladi.

Qanchalik g'alati bo'lmasin, bunda "Real"ga "Barselona" yordam berdi.

Bu qanday ro'y berdi?

Bu voqeani jurnalist Zak Lovi Sid Louning "La Ligadagi qo'rquv va nafrat" kitobiga tayanib bo'lishdi.

"Real" yozgi transfer oynasining so'nggi soatlarida Ronaldoni xarid qilish uchun zudlik bilan mablag' izladi. Pul Fernando Morentes uchun aynan 15 mln evro taklif qilgan "Barselona"dan kelishi mumkin edi. Ammo, dedlaynga ikki soat qolganda bitim barbod bo'ldi – tomonlar shartnoma shartlari borasida kelisha olishmadi. "Real" braziliyalikni boy berishi mumkin edi, bu esa faqatgina "Barsa"ning qo'lida edi.

"Inter" o'sha paytda Ernan Kresponi xarid qilgan va klub prezidenti Massimo Moratti klubda bir yo'la ikki yulduz forvardni saqlab qolmoqchi emasdi. "Real" Morentesni sota olmagani uchun "Inter"da Ronaldodan qutulish imkoniyatlari so'nib borayotgandi. Klub yon berishiga to'g'ri keldi – "Real" yakunda 45 mln evro emas, 35 to'ladi. SHu bilan birga, klublar "Real" bundan keyin "Inter"ga Santyago Solari yoki Stiv Makmanamanni berishi, yoki 10 mln evro bonus to'lashi haqida kelishib olishdi.

2003 yilning yanvarida Ronaldoning bitimi doirasida aynan Solarining o'tishi kutilgan edi. Ammo, o'tish amalga oshmadi, "Inter" baribir 10 mln evroni ololmadi (nega – nomalum). Solari "Inter"da 2,5 yil o'tibgina paydo bo'ldi, ammo transfer Ronaldoning o'tishiga umuman bog'liq emasdi.

Ronaldo bo'yicha muzokaralar qanday o'tdi?

Qiyin.

Bitimni transfer oynasi yopilishiga bir necha daqiqa qolganda yopishning uddasidan chiqildi – garchi Ronaldoga "Real" tomonidan qiziqish bundan bir necha haftalar oldin boshlangan bo'lsa ham.

"Real" transfer oynasi yopilishidan bir hafta oldin hatto bitimdan rad etishini elon qildi. Ammo, Ronaldo har qanday holatda ham "Inter"dan ketmoqchi ekanini aytib javob berdi – bu madridliklarning muzokaraga qaytishga undadi.

Ronaldo natijalarni "Inter" shtab-kvartirasida kutdi. Atrofda esa braziliyalikning o'tishiga qarshi namoyish o'tkazgan ikki yuzlab atrofida Milan klubi muxlislari to'plandi.

"Barsa" bilan Morentesning bitimi barbod bo'lishi jarayonni yanada og'irlashtirdi. Joan Gaspar (o'sha paytdagi "Barsa" prezidenti) ataylab "Real"ga Ronaldoni xarid qilishga halaqit berish uchun Morentesning transferini barbod qilgan degan talqin mavjud. Louning fikricha, Gasparning motivaciyasi ikki yil oldingi Figuning transferi uchun madridliklardan qasos olish edi.

Gasparning qasosi amalga oshmadi – "Inter" va "Real" baribir kelishishdi va o'zaro qo'l tashlashdi.

"Bu "Real" uchun baxtli kun. Dunyoning eng yaxshi o'yinchilaridan biri bilan shartnoma imzolaganimizdan juda ham mamnunmiz, – dedi "Real" sport direktori Xorxe Valdano transferdan so'ng. Xorxe o'shanda braziliyalikning katta xohishisiz hech narsa chiqmagan bo'lishini takidladi. – U maoshining qisqarishiga tayyor edi va "Real"da o'ynash imkoniyatiga katta ishtiyoq bilan qaradi.

***

Bu bitimning ishtirokchilari taqdiri turlicha ketdi. Morentes 2003 yilning yozida "Monako"ga o'tdi va ilk mavsumidayoq CHL finaligacha chiqdi. Krespo "Inter"da qolmadi va bir yildan so'ng "CHelsi"ga yo'l oldi. Ernan 2006 yilda "Inter"ga qaytdi va u erda uch yilni o'tkazdi. Ronaldo "Real"da yomon harakat qilmadi: umumiy 177ta o'yinda 103ta gol urdi.

Sports.ru saytidan Alisher Ostonov tarjimasi