Bahrom Haydarov: "Qolgan jamoalar ham uxlayotgani yo'q. Ikkinchi davrada kamida 30 ochko to'plashimiz kerak"

"Qo'qon-1912" jamoasi kecha nazorat uchrashuvida "Paxtakor" bilan bellashdi. Mazkur uchrashuvdan so'ng jamoa bosh murabbiyi Bahrom Haydarov tarkibdagi o'zgarishlar va taraddud jarayonlari haqida to'xtalib o'tdi. 

-  Dastlab yozgi o'quv-mashg'ulot yig'inlaridan boshlasak...

- Birinchi davrani yakunlashimiz biz uchun biroz qiyinchilik tug'dirdi. 2-3 ta o'yin omadsiz kelgani uchun yigitlar ruhan tushkunlikka tushib qoldi. Ikkinchi davra boshlanguniga qadar vaqtimiz bor. Xatolarni tuzatishga harakat qilyapmiz, tarkibda o'zgarishlar bor. Birinchi davrada mahoratli futbolchilar etishmadi. Yig'inlarga kelsak, 1-2 xafta tog'da jismoniy holatimizni yaxshilash ustida ishladik. 2 kun avval maydonga qaytdik. Birinchi nazorat uchrashuvimiz "Paxtakor"ga qarshi bo'ldi. Umuman olganda ilk taassurotlarimiz yomonmas. Mag'lubiyatga uchrash achinarli. Lekin o'yinimizda o'zgarish bo'ldi. 

- SHota Gvazava, Husniddin G'ofurov, Azamat Soyibov kabi yangi nomlar yig'inda qatnashmoqda. Tarkibda yana qanday o'zgarishlar bor?

- Himoyamizni kuchaytirishimiz kerak. Gvazava tajribali futbolchi. U tayanch zonamizda harakat qiladi va shartnoma tuzib bo'lganmiz. "Nasaf" tarbiyalanuvchisi Egor Ukraina fuqarosi, yaxshi taassurot qoldirdi. Islom Abdullaev kichik jarohat olgani uchun darvozabon ham olish ehtiyoji paydo bo'ldi. Hozircha faqat SHota Gvazava bilan shartnoma imzoladik 

- "Qo'qon-1912" oldiga Superligaga chiqish vazifasi qo'yilgandi. Ikkinchi davrada jamoada nimani o'zgartirish kerak?

- Albatta, xatolarimiz ko'p bo'ldi. Hamma aybni omadsizlikka ham to'nkab qo'yish kerakmas. Ko'p gol o'tkazib yuborganmiz. Mudofaa chizig'ida muammolarimiz ko'zga tashlanib qoldi. Vaziyatlardan foydalana olmaslik ko'p jamoalarning kasalligi hisoblanadi. Iloji bo'lsa goleador yoki legioner hujumchi olishni reja qilganmiz. Oldimizdagi vazifamiz turibdi. 7-8ta turda etakchilarga etib olamiz. 

- Ikkinchi davrada natijalar qanday bo'lishini kutyapsiz? Jamoa taxminan qancha ochko to'plashi kerak?

- 14 ta o'yinni hammasini yutishni istaymiz. Kamida 30 ochko to'plasak yaxshi natijaga erishgan bo'lamiz. Lekin qolgan jamoalar ham uxlab yotgani yo'q. Yaxshi tayyorgarlik ko'rishyapti. Oxirigacha kurashamiz. Mavsum oxirida muxlislarni xursand qilamiz va Superliga yo'llanmasini qo'lga kiritamiz.