Bahodir Nasimov: "Iordaniyadan kuchli o'ynadik"

Eronning "Padideh" klubi vakili Iordaniyaga qarshi o'rtoqlik uchrashuvida ishtirok etdi. Biz Nasimov bilan ushbu o'yin va navbatdagi ikki bahs haqida suhbatlashdik.

- Terma jamoaning Dubaydagi ikkinchi yig'iniga qo'shildingiz. Iordaniyaga qarshi o'rtoqlik uchrashuv haqida fikrlaringiz?
- Iordaniyaga qarshi o'rtoqlik uchrashuvi edi. Maqsadimiz g'alaba qozonish edi. Menimcha yaxshi o'yin bo'ldi. Raqiblarimiz ham, biz ham Osiyo Kubogiga tayyorlanayapmiz. Birinchi bo'limda 3-4 vaziyatdan foydalana olmadik. Iordaniya esa deyarli birinchi imkoniyatdan gol urdi. Butun o'yinni olsak ulardan ustunroq o'ynadik deb o'ylayman.

- Oldinda so'nggi ikkita o'yin kutib turibdi. Iroqqa qarshi bahslar orqali Mirjalol Qosimov Avstraliyaga boradigan yakuniy tarkibni aniqlab oladi...
- 25 va 28 dekabr kunlari Iroqqa qarshi ikki marta o'ynaymiz. Iroq Iordaniyadan kuchliroq bo'lsa kerak. Uch nafar futbolchining Osiyo Kubogiga bormasiligi aniq. SHu sabab, Iroq bilan o'yinlarda bor kuchimiz bilan o'ynaymiz. Albatta, gol urishga harakat qilaman.

- Hozirgi O'zbekiston terma jamoasi Osiyo Kubogida yaxshi natija qayd etishga qodirmi?
- Albatta, jamoa yaxshi o'ynamoqda. Men Avstraliyaga boramanmi yoki yo'qmi, qita chempionatida zafar quchish vaqti keldi.

Nodirxo'ja Yuldashev
Dubay