Asqar Umarov: ”Zomin” o'z uyida hech kimga ochko beradigan jamoa emas”

Mazkur uchrashuvda darvozalar daxlsiz qoldi – 0:0. O'yindan keyingi matbuot anjumanida “Zomin” bosh murabbiyi Asqar Umarov o'z fikrlarini bildirdi. 

-  Bugungi bellashuv haqida qanday fikr bildira olasiz?

-  Uchrashuv haqida gapiradigan bo'lsak, albatta futbolchilarimizga katta rahmat aytaman. Ular birinchi o'yin bo'lishiga qaramay, borini berib o'ynashdi. Muxlislarimizga ham qo'llab-quvvatlagani uchun rahmat aytaman. Mashg'ulotlardagi harakatlarimizni yigitlar maydonda ko'rsata olishdi, deb o'ylayman. Bugun ozgina omadimiz kelmadi va gollarni urolmadik. Keyingi uchrashuvlarda “Zomin” muxlislariga g'alabalarni taqdim qilamiz, degan umiddaman.

-  Bugun “Andijon”dan qanday o'yin kutgandingiz?

-  Ular tajribali va shuning evaziga yaxshi harakat qilishyapti. Tarkibida bo'ydor o'yinchilar to'p tepishar ekan. Ammo bizning futbolchilarimiz shunga mos ravishda o'ynadilar. 

-  “Zomin” jamoasi ushbu uchrashuvda bir ochkoni qo'lga kiritdimi yoki ikkinchi ochkoni yo'qotdimi?

-  Bu birinchi uchrashuv bo'lganligi sababli biz bir ochko qo'lga kiritdik, deb hisoblayman. Keyingi o'yinlarda uch ochkolarni qo'lga kiritishga harakat qilamiz. “Zomin” o'z uyida hech kimga ochko beradigan jamoa emas. Faqat uch ochko olib, oldinga harakat qilamiz.