"Arsenal" va "Manchester Yunayted" APLda o'ynayotgan xavbekning transferini ko'rib chiqmoqda

"Arsenal" va "Manchester Yunayted" Italiya terma jamoasi hamda "Nyukasl" yarim himoyachisi Sandro Tonalini transfer qilish imkoniyatini o'rganmoqda.

"Arsenal" transfer bozorida juda faol bo'lib qolmoqda va yaqindagi yirik xaridlardan keyin ham to'xtab qolishni rejalashtirmayapti. Londonliklar yozda "Nyukasl" yarim himoyachisini safiga qo'shib olmoqchi.

"Tuttosport" malumotlariga qaraganda, "kanonirlar" Angliyada eng yaxshi mavsumlaridan birini o'tkazayotgan italiyalik futbolchiga qiziqish bildirmoqda. Shuningdek, "Manchester Yunayted" ham o'yinchiga qiziqish bildiryapti.

Qayd etish joiz, Tonali joriy mavsum 37 o'yin o'tkazib, 4 ta golli uzatmani amalga oshirdi. Uning "hakkalar" bilan shartnomasi 2028 yilning yozigacha amal qiladi, bu esa ehtimoliy transfer katta mablag' talab qilishini anglatadi — "Nyukasl" futbolchini 100 mln funtga baholagan.