Anzur Ismoilov: "To'xtaxo'jaevga yana bir nechta o'yin kerak"

"CHanchun Yatai" himoyachisi 28 sentyabr kuni Toshkentga kelgan edi. 

"Bahrayn safarda bizga qiyinchilik tug'dirishi mumkin bo'lgan KXDRdan keyingi ikkinchi jamoa. Lekin bizni bu cho'chitayotgani yo'q. KXDRdagi mag'lubiyatdan so'ng futbolchilar oldida yo'qotilgan uch ochkoni, qolgan o'yinlar orqali maksimal miqdorda to'ldirish vazifasi qo'yilgan. Buni avvalo o'zimiz anglab turibmiz. So'nggi ikkita o'yinda 6 ochko ishladik. Qolgan bahslarda ham g'alaba qozonishimiz kerak. Faqat Denisovni safdan chiqqanligi kichik o'zgarishlarga sabab bo'lishi mumkin. Markaziy himoyachi sifatida sheriklarimni tartib asosida ushlab turishim kerak. To'xtaxo'jaevga kelsak, agar meni ham hozir qanotga qo'yishsa o'zim bilmagan holda markazga o'tib qolaverishim mumkin. Islomda ham shu holat kuzatildi. Yana 2-3ta o'yindan keyin u bu nuqtani o'zlashtirib oladi deb o'ylayman. Bahrayn terma jamoasi esa so'nggi turda yaxshi o'ynadi. Manamada bizni qiziq o'yin kutib turibdi", - deydi Anzur Ismoilov.