Akmal Rustamov: "O'ylaymanki, biz o'yindan o'yinga kuchayib boramiz"

- Dastlab o'yin haqida fikringiz?

- Avvalo butun Navoiy xalqini va muxlislarimizni ushbu g'alaba bilan tabriklayman. O'tgan tur "Surxon" bilan bo'lgan qiyin uchrashuvdan so'ng tezda tiklanib bu bahsga etiborimizni qaratdik. Yigitlarga rahmat, hamma bor kuchi bilan o'ynab g'alaba qozondik. "Buxoro"ni o'rganib chiqqandik, raqibning uzun uzatmalar bilan o'ynashiga tayyor edik.

-  Oxirgi ikki turdan beri Shahzod Rahmatullaev barvaqt zaxiraga olinayotgandek.

- Bu taktika bilan bog'liq. Hozirgi futbolda ayniqsa markaziy yarim himoyachilar katta hajmdagi ishni bajaradi. Bu toifadagi futbolchilar 60-70 daqiqa o'ynab, toliqib qolishadi. Bir oylik tanaffusda biz ko'proq o'rtani kuchaytirishga harakat qildik. Shu bois ham Shahzod charchab qolgani uchun birmuncha erta zaxiraga olyapmiz.

- Uyda himoyaviy o'yin ko'ryapmiz. Bu g'alati emasmi?

- Uchrashuvni muxlis sifatida tomosha qilganlar shunday o'ylashi mumkin. Lekin biz bir to'xtamga kelish uchun malum taktika ustida ish olib boramiz. Qaysi tomonimiz kuchli bo'lsa, shundan foydalanishga harakat qilamiz. Hozir Evropada ham top klublar raqibni ikkinchi hududda kutib qarshi hujum bo'yicha o'ynayapti. Birinchi taymda 7-8ta imkoniyatga ega bo'lib bitta gol urdik. To'g'ri, ikkinchi bo'limda vaziyat kam bo'lgandir, lekin hisobni saqlab qolish uchun o'ynamasak bo'lmasdi.

- O'yinning oxirgi daqiqalarida zaxiradan futbolchi maydonga tushishga tayyor turibdi, lekin futbolchilar to'pni maydon tashqarisiga tepib yubormasdan hujumga o'tishyapti. Zaxiradan tushishi kerak bo'lgan o'yinchi esa qarab qolyapti. Undan ko'ra to'pni tepib yuborib o'sha futbolchining maydonga tushishiga imkon bergan yaxshimasmi?

- Jamoa hujumga o'tganda hammaning o'y-xayoli gol urishda bo'ladi. Bu o'rinda hech kim to'pni shunchaki tepib yubormaydi. Buni to'g'ri qabul qilish kerak, balki o'sha vaziyat gol bilan yakunlanib qolsa-chi.

- Bugun jamoangiz 4-3-2-1 sxemasida o'ynadi. Hammasi yaxshi ko'rindi, faqat oxirgi pasni berishda kamchiliklar kuzatilyapti. Bu nima bilan bog'liq? 

- Bu savolni ko'p muxlislar bermoqda. Jamoamizda uch nafar yangi futbolchi bor va bugun ularning uchalasi ham asosiy tarkibda maydonga tushdi. Bular - Islom Kenjaboev, Shohro'z Norxonov va Asror G'ofurov. O'ylaymanki, biz o'yindan o'yinga kuchayib boramiz. Yangi futbolchilar jamoaga to'liq kirishib ketganidan keyin hammasi yaxshi bo'ladi.