Akbar Ismatullaev Tailandning 7 karra chempioni safiga qo'shildi

Ismatullaev Tailandning 7 karra chempioni "Buriram" klubi bilan shartnoma tuzdi. O'tgan mavsumda "Buriram" Tailand chempionatida kumush medallarga ega chiqdi.

"Buriram Yunayted" futbol klubi 1970 yilda tashkil topgan. Uy o'yinlarini 32600 tomoshabinga mo'ljallangan "CHang Arena" stadionida o'tkazadi. Bugungi kunda jamoani chernogoriyalik murabbiy Bojidar Bandovich boshqarib kelmoqda. Klub yaqinda "Paxtakor"da o'ynagan isroillik Gidi Kanyuk bilan ham shartnoma tuzgandi. Bundan tashqari xorvatiyalik Renato Kelich va serbiyaik Marko Cepovich kabi legionerlar ham "Buriram" safiga qo'shilishdi.

2012 yilda "Buriram" safida o'zbekistonlik Anvar Rajabov to'p tepgan edi.

Tailand chempionatida 4ta turdan keyin pandemiya tufayli tanaffus yuzaga kelgan. 5-tur o'yinlari 12-13 sentyabr kunlari bo'lib o'tadi. Bu turda "Buriram" "Bangkok Glass" mehmoni bo'ladi.

Malumot uchun, Tailandda yana bir hamyurtimiz Sardor Mirzaev ham to'p tepmoqda. U "Muangtong Yunayted"da o'ynamoqda.

Akbar Ismatullaev 2009-2017 yillarda "Paxtakor" klubida o'ynagan, 2018 yildan buyon "Metallurg" safida faoliyat olib bormoqda. O'zbekiston terma jamoasi safida 5ta o'yinda maydonga tushgan.