Agamurodov va futbolchilar "Dinamo" muxlislari bilan uchrashishdi

Norasmiy ochiq muloqot tarzida tashkil etilgan uchrashuvda Dinamo bosh murabbiyi Tachmurod Agamurodov, klub sport direktori Rustam Istamov hamda futbolchilardan jamoa sardori Andrey Melnichuk, Aziz Ibragimov va Avaz Agalievlar ishtirok etishdi.

Ushbu uchrashuvdan ko'zlangan asosiy maqsad Dinamo klubi va muxlislar o'rtasida yaqin aloqani o'rnatish va har bir masalada o'zaro fikr almashishdan iborat edi. Jumladan, shu kuni uchrashuvga taklif etilgan 30 ga yaqin ashaddiy muxlislar o'zlarini qiziqtirgan savollar bilan bosh murabbiy Tachmurod Agamurodov va futbolchilarga murojaat etishdi. Bu borada murabbiy va futbolchilar ham ishqibozlarning hech bir savolini javobsiz qoldirishmadi.

Biz klub va muxlislar o'rtasida hech qanday to'siq bo'lishini istamaymiz. SHu bois muxlislar bilan uchrashib, jamoaning holati, klub vazifalari va oldida turgan muammolari haqida atroflicha ochiq muloqotlarni o'tkazib turish faqat jamoaning foydasiga ishlaydi - deydi bosh murabbiy.

Ochiq muloqot tarzida o'tgan uchrashuv uchun jamoa azolariga minnatdorchilik bildirgan muxlislar, jamoa va ishqibozlar o'rtasida ko'prik vazifasini bajaruvchi bunday yig'ilishlarni tez-tez o'tkazib turishga kelishib olishdi. Uchrashuv so'ngida muxlislar Dinamo jamoasiga Qizilqum bilan o'yinda omad tilab qolishdi.