Championat.asia sayti muxbiri "qaldirg'ochlar" yarim himoyachisi Umid Sultonov bilan suhbatlashdi.
- "Bunyodkor"ga kelishingiz qanday sodir bo'lgan?
- "Bunyodkor"ga 2015 yilda kelganman. Dastlab akademiyada tahsil oldim, 16 yoshimda Viktor Karpenko meni o'rinbosarlar jamoasiga taklif qilgan. Hozir Shuhrat Maqsudov jamoaning asosiy tarkibiga jalb qildi.
- Taniqli futbolchi va murabbiy Vali Sultonovning farzandisiz. Futbolchi bo'lishingizda otangizning hissasi katta bo'lganmi?
- Albatta, dadamga qiziqib futbolga kirib kelganman. Yoshligimda kelajakda dadamdan ham kuchli futbolchi bo'lishni o'z oldimga maqsad qilib qo'yganman.
- Ko'pchilik sizni Jaloliddin Masharipovga o'xshatishadi. Siz ham xorazmliksiz. Ko'pchilik xorazmlik futbolchilar Toshkentga kelganida sheva bilan bog'liq qiyinchiliklar bo'lishini eshitganmiz. Sizda qanday bo'lgan?
- Boshida kelganimda shevam tufayli qiynalganman, boshqa bollardan ajralib yurardim. Keyin sekin-sekin o'rganib ketganman.
- Barcha futbolchilarning laqabi bor. Sizda ham laqab bormi?
- O'tgan yil "Bunyodkor" asosiy tarkibida tushishni boshlaganimda yoshi katta futbolchilar hazillashib "guruch" deb chaqirishdi. Shu-shu hozirgacha shunday chaqirishmoqda.
