27 noyabr kuni ushbu musobaqada 3-tur uchrashuvlari o'tkazildi. Ushbu turda O'zbekiston hamda Eron milliy terma jamoalari o'zaro maydonga tushishdi va uchrashuvda O'zbekiston termasi raqibini 2:1 hisobida mag'lub etdi. Uchrashuv yakunida esa, har ikki terma jamoa a'zolari o'rtasida ziddiyatli vaziyat yuzaga kelgan.
Ushbu musobaqa Tartib-intizom qo'mitasi uchrashuv videotasmasini ko'rib vaziyatni o'rganib chiqdi hamda har ikkala terma jamoadan bir nafar futbolchini jazoladi. Jumladan, O'zbekiston terma jamoasining 14-raqamli futbolchisi Rushaniya Safina hamda Eron termasining 9-raqamdagi futbolchisi Zahro Gambari musobaqaning 1-ta uchrashuvga diskvalifikaciya qilinishdi.
Shuningdek, ikki terma jamoa murabbiylar shtabi futbolchilarning tartib va intizomi bo'yicha musobaqa tartib-intizom qo'mitasi tomonidan ogohlantirildi.
Eslatib o'tamiz, musobaqaning navbatdagi turida O'zbekiston milliy terma jamoasi Qirg'iziston bilan, Eron terma jamoasi esa Tojikiston termasi bilan o'zaro bahs olib boradi.
