Avvalboshi jadvalning umumiy ko'rinishiga yaxshilab razm soling. Quyida esa holat butunlay o'zgarib ketadi.

O'tgan turdan keyin Namanganning “Navbahor” klubi ahvolini ancha og'irlashtirib qo'ygandek edi. Biroq 7-turda “Bunyodkor” mag'lub etilgach, Namangan klubi yana dastlabki oltilikka kirib oldi.

Mana shu oltilik orasida eng yomon ko'rsatkich hozircha “Paxtakor”ga tegishli. Chunki klub ayni vaqtda kuchli bo'lib turgan jamoalarni taslim qila olgan emas. Arveladze jamoasi hozircha quyi oltilik klublarini mag'lub etayotgani uchun ham umumiy jadvalning yuqori qismida turibdi.

“Bunyodkor” Farg'ona yoki Jizzaxda mag'lub bo'lganida, bu holat bilinmay ketishi mumkin edi. Biroq Namangandagi qoqilish jadvalda endi unga tasir ko'rsata boshlaydi.

Chempionlik yo'lida

Bunyodkor 3 2 0 1 5:3 6

Buxoro 4 2 0 2 4:6 6

Nasaf 3 1 2 0 3:1 5

Qo'qon-1912 3 1 1 1 1:1 4

Navbahor 3 1 1 1 2:2 4

Paxtakor 2 0 0 2 0:2 0

Quyida esa “Lokomotiv” o'zini biroz o'nglab oldi. Chunki “temiryo'lchilar” o'zlari bilan bir guruhda bo'lgan Jizzax klubini mag'lub etishdi. Biroq jadvalga yaxshilab razm solinsa, Viktor Kumikov boshqaruvidagi AGMK hammadan yaxshiroqdek ko'rinadi. Chunki ular kuchsiz jamoalarga ochko ulashishmapyati.

Jon saqlash yo'lida

Lokomotiv 4 2 1 1 6:2 7

AGMK 2 2 0 0 4:1 6

Qizilqum 3 2 0 1 4:4 6

Metallurg 2 1 1 0 3:1 4

Neftchi 3 0 1 2 1:4 1

So'g'diyona 4 0 1 3 1:7 1

8-tur haqida

24 aprel, seshanba

Neftchi - Metallurg 18:00

Buxoro - Qizilqum 20:00

25 aprel, chorshanba

Paxtakor - Navbahor 18:30

So'g'diyona - Qo'qon-1912 20:30

26 aprel, payshanba

AGMK - Nasaf 18:30

Bunyodkor - Lokomotiv 20:30

Mazkur turda “Neftchi” nima qilib bo'lsa-da zafar quchishi kerak. Yo'qsa Farg'ona klubining yurak urishi yanada og'irlashib boraveradi. Bunda esa albatta muxlislar daldasi juda kerak. Oddiy misol, 7-turda “Buxoro” va “Navbahor” aynan muxlislari hisobiga zafar quchdi. Ular haqiqiy 12-o'yinchi rolini o'ynay oldi.

“Paxtakor” esa va nihoyat kuchli oltilik klublaridan birini mag'lub etishi mumkin. “Navbahor” o'sha muxlislari ko'z oldida sherga aylanayotgan bo'lsa-da, safarda ishlari joyida emas. Zero Toshkentning ikki grandi Namanganda taslim etilgan bo'lsa-da, safarda hatto “So'g'diyona”ga ham imkoniyat boy berilgan.

Payshanba kuni esa 2 ta dahshatli o'yin bor. AGMK va “Nasaf” O'zbekiston Kubogida ham o'zaro raqib bo'lgandi. Bu safar ular Superliga doirasida dahshatli o'yin o'tkazadi. Olmaliq ayni vaqtda har qanday jamoa uchun qo'rqinchli. Toshkent derbisi esa fantastik to'qnashuv deb bemalol aytish mumkin. O'sha uchrashuvni nima qilib bo'lsa-da stadiondan tomosha qilish kerak bo'ladi.

Superliga kutilganidan yaxshiroq o'tishda davom etmoqda. Biz bundan g'ururlanishimiz mumkin. Agar harakat to'xtamasa, yaqin 2-3 yilda milliy chempionat biz o'ylagan mavqega chiqib olsa ajab emas. Kelasi turda hamma-hammaga omad.

Superliga. “Neftchi” va “So'g'diyona”ning ahvoli og'ir. “Lokomotiv” va “Navbahor” o'zini o'nglab oldi