Asosiy tarkibning ko'plab futbolchilari jamoani tark etganiga qaramay, mashg'ulotlarda bir necha yangi o'yinchilar ishtirok etayotganini ko'rishimiz mumkin. Ularning aksariyati esa jamoa uchun begona hisoblanmaydi. "Bunyodkor" bosh murabbiyi Shuhrat Maqsudov biz bilan suhbatda bu boradagi fikrlarini bildirib o'tdi.

"Assalomu alaykum. Avvalo, barchani kirib kelgan yangi yil bilan tabriklayman. Ushbu yil tinchlik, xotirjamlik va salomatlik yili bo'lsin. Qolgani topiladigan narsa. Hech kimga sir emas, jamoamizning 80 foiz futbolchilari tark etdi. Fursatdan foydalanib, ularga rahmat aytaman. O'tgan yili bir oila bo'lib harakat qila oldik. Ushbu o'yinchilar bilan faxrlanaman. Boisi, aksariyatini yoshlar jamoasidan beri bilaman. Ularning ishlarida omad tilayman. Futbolchilarimizning etakchi jamoalarga o'tishi avvalgi yil yaxshi mavsum o'tkazganimizni anglatadi. Yashirishning hojati yo'q, kuchli uchlikdagi jamoalarga nisbatan biz qiyinroq vaziyatda edik. Shunga qaramay, ikkinchi o'rinni egallagan jamoadan ikki ochko ortda qoldik. Hayot davom etadi. Yaqinda bosh homiyimiz Mehriddin Razzoqovich Abdullaev bilan uchrashdik. Oldimizga jamoani qaytadan yoshlar bilan shakllantirish vazifasini qo'ydi. Nasib qilsa, bir-ikki nafar tajribali futbolchilar atrofida yosh jamoa tuzishni reja qildik", - deydi Shuhrat Maqsudov.
- Jamoa yig'inida Dilshod Jo'raev, Artyom Filiposyan, Usmonali Ismonaliev ishtirok etmoqda. Ularni olib qolish rejalashtirilganmi?
- Baribir har bir poziciyaga tajribali va nomdor futbolchi olish kerak. Boisi, tarkibni darhol yoshartirish ham noto'g'ri. Yoshlar o'zlaridan katta futbolchilarga qarab o'sishadi. O'ylaymanki, ular bilan kelishuvga erishamiz. Nafaqat maydonda, balki uning tashqarisida ham o'rnak bo'lishadi. Qolganini vaqt ko'rsatadi.
- Joriy yilda jamoa shaxsan o'zingizni qo'l ostingizda yig'ilib, o'z imzongiz bilan shakllanadi desak bo'ladimi?
- O'tgan yili ham jamoaga o'zim bosh bo'lganman. Tarkibdagi hech kim begona emas. Suhrob Sultonov, Dilshod Jo'raev sobiq futbolchilarimiz hisoblanadi. Aytganimdek, shakllanish uchun biroz vaqt kerak bo'ladi. Kimdandir oldin, kimdandir keyin yaxshi jamoa tuzishni maqsad qilganmiz.

Shuhrat Maqsudov: "Kimdandir oldin, kimdandir keyin yaxshi jamoa tuzishni maqsad qilganmiz"