"Manchester Yunayted" hujumchisi Markus Reshford juma kuni klub mashg'ulotini o'tkazib yubordi. Internet tarmog'ida esa futbolchi chorshanba kuni Belfastdagi tungi klublardan biriga tashrif buyurgani aks etgan video tarqaldi. Futbolchiga yaqin insonlarning ma'lum qilishicha, Markusning qorni ochgan va u erga ovqatlanib olish uchun kirgan. Sog'lig'idagi muammo tufayli esa ortga qaytish uchun reysini boshqa kunga o'zgartirishga majbur bo'lgan.
"Qizil iblislar" ustozi Erik ten Xag shogirdi Reshford salomatligi bilan bog'liq muammo tufayli jamoa mashg'ulotini o'tkazib yuborganini ma'lum qildi.
Bugun kechasi "Manchester Yunayted" Angliya Kubogi doirasida "Nyuport Kaunti"ga qarshi o'yin o'tkazadi. Reshfordning undagi ishtiroki hozircha so'roq ostida qolmoqda.
