“Кучли бешлик шарҳи”да Ла Лиганинг 2-тури, шунингдек, Англия, Италия ва Франция чемпионатларининг биринчи туридаги асосий воқеалар ҳақида сўз юритамиз.
Ла Лига: “Барселона”дан бешта гол, “Реал”дан қийин ғалаба
“Барселона” мавсумдаги илк учрашувини “Эльче” майдонида ўтказиб, рақибини 5:0 ҳисобида мағлуб этди. Рафинья ва Фермин Лопес иккитадан гол урди, ёзда жамоага қўшилган Карим Адейеми эса Ла Лигадаги дебютидаёқ даврозага тўп киритди. Захирадан майдонга тушган Энтони Гордон икки голли узатма билан ажралиб турди.
Ҳанси Флик жамоаси биринчи ўйиндаёқ ҳужумда вариантлар етарли эканини кўрсатди. Янги футболчилар ҳам жамоага тез мослашаётгандек. Фақат Гавининг жароҳат олиб майдонни тарк этгани каталонияликлар учун ёқимсиз ҳолат бўлди.
“Реал” ҳам чемпионатдаги биринчи ўйинини ғалаба билан якунлади. Жозе Моуриньо жамоаси “Эспаньол”ни сафарда 2:1 ҳисобида енгди. Жуд Беллингем 9-дақиқада ҳисобни очди, Алекс Калатрава эса биринчи бўлимда мувозанатни тиклади. Мадридликларга уч очко келтирган голни 90-дақиқада захирадан тушган Карлос Эспи урди.
Натижа бор, аммо “Реал” учун уч очко осонлик билан келмади. Энг муҳими, Моуриньонинг алмаштириши иш берди — дебютант Эспи биринчи расмий ўйинидаёқ жамоасини қутқарди.
“Атлетико” эса “Вильярреал” билан 2:2 ҳисобида дуранг ўйнади. Робин Ле Норман четлатилганидан кейин мадридликлар ўн киши бўлиб қолди, шунга қарамай Жулиано Симеоне жамоасига бир очко олиб келган голни урди.
“Севилья” Бильбаода “Атлетик”ни 3:1 ҳисобида мағлуб этди. “Бетис” “Реал Сосьедад”дан устун келган бўлса, “Хетафе” “Расинг”ни минимал ҳисобда енгди. Турнинг сўнгги икки ўйинида “Осасуна” — “Леванте” учрашувида ҳисоб очилмади, “Малага” ва “Депортиво” эса 1:1 ҳисобида дуранг ўйнади.
Ла Лига. 2-тур натижалари
“Райо Вальекано” 1:1 “Алавес”
“Бетис” 1:0 “Реал Сосьедад”
“Атлетик” 1:3 “Севилья”
“Валенсия” 0:0 “Сельта”
“Эспаньол” 1:2 “Реал”
“Атлетико” 2:2 “Вильярреал”
“Хетафе” 1:0 “Расинг”
“Эльче” 0:5 “Барселона”
“Осасуна” 0:0 “Леванте”
“Малага” 1:1 “Депортиво”
АПЛ: “МЮ”да сенсацион мағлубият, “Челси” Алонсо билан ғалабали бошлади
Англия чемпионатининг янги мавсуми амалдаги чемпион “Арсенал” учун муваффақиятли бошланди. Микель Артета жамоаси АПЛга қайтган “Ковентри”ни 3:0 ҳисобида мағлуб этди. Кай Ҳаверц, Букайо Сака ва Мартин Эдегор гол урди.
Лондонликлар мавсумни ишончли ғалаба билан очди ва чемпионликни ҳимоя қилишга тайёр эканини дастлабки ўйиндаёқ кўрсатди.
“Манчестер Сити”нинг Энцо Мареска бошчилигидаги биринчи ўйини эса анча қийин кечди. “Борнмут” узоқ вақт 1:0 ҳисобида олдинда борди, аммо ўйин охирида Марк Гехи ҳисобни тенглаштирди, қўшимча вақтда эса Йошко Гвардиол ғалаба голини урди — 2:1.
“Сити” уч очкони олди, лекин биринчи турнинг ўзида янги мураббийга иш етарли экани ҳам кўринди.
Турнинг асосий сенсацияларидан бири “Манчестер Юнайтед” иштирокида қайд этилди. Майкл Кэррик жамоаси АПЛга қайтган “Халл Сити”га 0:2 ҳисобида ютқазди. Семи Ажайи ва Нобель Менди мезбонларга ғалаба келтирди. “Халл” шу тариқа “Юнайтед”ни чемпионатда 52 йилдан кейин илк бор мағлуб этди.
“Ливерпуль” ҳам уч очко билан бошлай олмади. “Қизиллар” сафарда “Ньюкасл” билан 2:2 ҳисобида дуранг ўйнади. Доминик Собослаи қўшимча вақтда пенальтини аниқ амалга ошириб, жамоасини мағлубиятдан қутқарди. “Тоттенхэм”нинг “Брентфорд”га 0:3, “Астон Вилла”нинг “Брайтон”га 0:4 ҳисобида ютқазиши ҳам биринчи турнинг кутилмаган натижалари қаторига кирди.
Турга “Фулхэм” — “Челси” ўртасидаги Лондон дербиси нуқта қўйди. Хаби Алонсо бошчилигидаги “Челси” рақибини 3:2 ҳисобида мағлуб этди. Жоау Педро 31-сониянинг ўзида ҳисобни очди, янги трансфер Морган Рожерс дебют ўйинида гол урди, Коул Палмер эса учинчи тўпни киритди.
“Челси”нинг ҳужум чизиғи биринчи ўйиндаёқ ўзини кўрсатди. Бироқ икки гол ўтказиб юборилгани ва ўйин охирида “Фулхэм”га ҳисобни тенглаштириш имконияти берилгани Алонсо ишлаши керак бўлган жиҳатлар ҳам борлигини кўрсатди.
АПЛ. 1-тур натижалари
“Арсенал” 3:0 “Ковентри”
“Халл” 2:0 “Манчестер Юнайтед”
“Ноттингем Форест” 0:1 “Лидс”
“Ипсвич” 2:1 “Сандерленд”
“Эвертон” 2:0 “Кристал Пэлас”
“Брентфорд” 3:0 “Тоттенхэм”
“Манчестер Сити” 2:1 “Борнмут”
“Брайтон” 4:0 “Астон Вилла”
“Ньюкасл” 2:2 “Ливерпуль”
“Фулхэм” 2:3 “Челси”
А Серия: “Интер” ва “Рома”дан тўрттадан гол
Италия чемпионатида асосий фаворитларнинг аксарияти мавсумни уч очко билан бошлади. Амалдаги чемпион “Интер” биринчи турда “Монца”ни 4:1 ҳисобида мағлуб қилди.
Ҳақан Чалҳанўғли ҳисобни очди, аммо “Монца” биринчи бўлимнинг ўзида жавоб қайтарди. Танаффусдан кейин “Интер” ўйинни ўз қўлига олди. Пётр Зелиньски, Пио Эспозито ва Янн Биссекнинг голлари миланликларга йирик ғалаба келтирди.
“Наполи” ҳам мавсумни ғалаба билан бошлади. Неаполликлар “Женоа”ни сафарда 2:0 ҳисобида енгди. “Милан” эса Рубен Аморим бошчилигидаги илк расмий ўйинда “Торино”дан 2:1 ҳисобида устун келди. 19 ёшли Альфаджо Сиссе А Сериядаги дебютидаёқ гол урди.
“Ювентус” “Фрозиноне”ни минимал 1:0 ҳисобида енгди. Туринликлар уч очкони олган бўлса-да, мавсумнинг биринчи ўйини улар учун осон кечмади.
Биринчи турнинг энг ёрқин натижаларидан бири эса Римда қайд этилди. “Рома” “Фиорентина”ни 4:0 ҳисобида тор-мор қилди. Дониэлл Мален хет-трик қайд этди, Пауло Дибала эса унинг учала голига ҳам ассистентлик қилди. Яна бир голни Николо Пизилли урди.
Жан Пьеро Гасперини жамоаси биринчи ўйиндаёқ ҳужумда жуда яхши кўринди. Айниқса, Дибала — Мален боғлами “Фиорентина” ҳимоясига катта муаммо туғдирди. Бир ўйиндан катта хулоса чиқаришга эрта, лекин “Рома”нинг бундай старти чемпионлик учун курашда уларни ҳам жиддий қабул қилиш кераклигини кўрсатди.
“Лацио” ҳам мавсумни уч очко билан бошлади — римликлар “Болонья”ни сафарда 1:0 ҳисобида мағлуб этди.
Шу тариқа А Сериянинг биринчи турида асосий даъвогарларнинг аксарияти очко йўқотмади. Аммо голлар ва ўйин сифати бўйича “Интер” билан “Рома” бошқалардан ажралиб турди.
А Серия. 1-тур натижалари
“Интер” 4:1 “Монца”
“Удинезе” 1:1 “Комо”
“Парма” 0:1 “Кальяри”
“Женоа” 0:2 “Наполи”
“Венеция” 0:2 “Лечче”
“Фрозиноне” 0:1 “Ювентус”
“Торино” 1:2 “Милан”
“Аталанта” 2:1 “Сассуоло”
“Болонья” 0:1 “Лацио”
“Рома” 4:0 “Фиорентина”
Лига 1: ПСЖ очко йўқотди, “Марсель”дан йирик ғалаба
Франция чемпионатида ПСЖ мавсумни ғалаба билан бошлай олмади. Парижликлар “Ренн” билан 2:2 ҳисобида дуранг ўйнади.
Биринчи бўлимдан кейин “Ренн” 2:0 ҳисобида олдинда бораётганди. Аммо захирадан майдонга тушган Ферран Торрес иккита гол уриб, ПСЖни мағлубиятдан қутқарди.
“Марсель” эса мавсумни жуда ишончли бошлади. Жамоа “Страсбург”ни 4:0 ҳисобида мағлуб этиб, дастлабки турдан кейин тўплар нисбати бўйича жадвалнинг биринчи ўрнига чиқди.
“Ланс” ҳам биринчи турда бешта гол урди. Жамоа “Осер”ни 5:2 ҳисобида енгди, Флориан Товен эса иккита пенальтини голга айлантирди.
“Лилль” сафарда “Анже”ни 2:0, “Лион” “Тулуза”ни 2:0, “Монако” эса “Гавр”ни 1:0 ҳисобида мағлуб этди. “Труа” — “Париж” ва “Ницца” — “Лорьян” учрашувларида ҳисоб очилмади.
Биринчи турда ПСЖ очко йўқотган бир пайтда “Марсель”, “Ланс”, “Лилль”, “Лион” ва “Монако” уч очкодан олди. Албатта, чемпионлик пойгаси ҳақида гапиришга ҳали жуда эрта. Лекин ПСЖнинг асосий рақиблари стартдаёқ унинг хатосидан фойдаланди.
Лига 1. 1-тур натижалари
“Марсель” 4:0 “Страсбург”
“Ланс” 5:2 “Осер”
“Труа” 0:0 “Париж”
“Тулуза” 0:2 “Лион”
“Ницца” 0:0 “Лорьян”
“Ле Ман” 2:2 “Брест”
“Анже” 0:2 “Лилль”
“Гавр” 0:1 “Монако”
“Ренн” 2:2 ПСЖ
Шу тариқа, мавсумнинг дастлабки ўйинлари фаворитлар учун турлича кечди. “Барселона”, “Арсенал”, “Интер” ва “Рома” ишончли ғалабалар билан бошлаган бўлса, “Реал” ва “Манчестер Сити” уч очко учун охиригача курашишига тўғри келди. “Челси” янги мураббий билан ғалабали старт олди, ПСЖ биринчи ўйиндаёқ очко йўқотди, “Манчестер Юнайтед” эса мавсумни кутилмаган мағлубият билан бошлади.
Бир турдан кейин ким чемпионликка тайёр, ким тайёр эмас деган хулоса чиқариш қийин. Лекин дастлабки ўйинларнинг ўзиёқ янги мураббийлар, ёзги трансферлар ва таркибдаги ўзгаришлар қайси жамоаларда тезроқ иш бераётгани ҳақида биринчи тасаввурни берди.
