- Ўйин ҳақида фикрингиз?
- Муҳим ғалабага эришдик. Пролигада осон ўйинлар бўлмайди. Жамоамизни чиройли ўйин ва ғалаба билан табриклайман. Тўрт кундан сўнг навбатдаги учрашувимиз бор ва бунга астойдил тайёргарлик кўрамиз. Бугун "Шўртан" ўз майдонида дуранг ўйнабди, бу футбол. Кўрганингиздек, осон учрашувлар бўлмаяпти. Бизнинг мақсадимиз битта - Суперлигага чиқиш. Хаёлимиз ҳам доим шунла. Бу масъулиятни футболчилар жуда яхши ҳис қилиб туришибди. Ҳар тўртинчи кун майдонга тушяпмиз ва бу ҳам осон бўлмаяпти.
- Иброҳим Нўъмонов билан Мўмин Мелиев негадир қайдномада кўринмаяпти?
- Бу икки футболчимизда жароҳат бор. Мелиев балки 1-2 турдан сўнг сафга қайтар, лекин Нўъмонов қишки йиғин пайти қаттиқ жароҳат олди. У тикланиб қайтиши учун яна вақт керак бўлади.
- Захирадан тушган легионер футболчи Максвел жуда яхши таассурот қолдирди. Бу ўйинчи ҳақида фикрингиз?
- Баъзи сабабларга кўра, бразилиялик футболчи таркибимизга кеч қўшилди. Ҳозир мослашув жараёнини бошдан кечиряпти ва ўйлайманки, тез орада ўзини яхши кўрсатади. Бугун майдонда 30 дақиқа ўтказиб, ҳужумчиларга мос ҳаракат қилди.
- Тез-тез ўйинлар сабаб жамоани тайёрлаш қанчалик қийин бўляпти?
- Пайтида ўзимиз ҳам футбол ўйнаганмиз ва тикланиш бу ўринда муҳим ўрин тутади. Бундан ташқари психология ҳам катта роль ўйнайди. Футболда кетма-кет ғалаба қозониш осон эмас, бунинг ҳам ўзига яраша машаққатлари бор. Бугун ҳисоб 2:0дан кейин жамоамиз бироз бўшашди ва гол ўтказиб юбордик. Шунинг учун вазиятга бемалол қараш керак эмас. Футболчилар билан руҳий тайёргарлик борасида ҳам ишлашга тўғри келяпти.
