Ўтган ҳафтада "шаҳарликлар" АПЛнинг молиявий қоидаларини бузиш бўйича деярли барча айбловлар бўйича айбдор деб топилгани ҳақида маълумот пайдо бўлди — фақат биттасидан ташқари. 2023 йилнинг февраль ойида АПЛ "Сити"ни 2009 йилдан 2018 йилгача бўлган даврда молиявий қоидаларнинг 115 та турли бузилишида айблаган эди. Кейинчалик The Times газетаси гап 115 та эмас, балки 130 та қоидабузарлик ҳақида кетаётганини хабар қилди: Премьер-лига эндигина айбловларни эълон қилганида, баъзи қоидалар бўйича чалкашлик юзага келган эди.
Кеча АПЛ клуб барча айбловлар бўйича айбдор деб топилганини маълум қилди.
— 2012 йилнинг учинчи чорагида клуб Longbow деб номланган лойиҳани ишга туширди. Биз клубнинг Longbow кўп тармоқли лойиҳа бўлгани, унинг мақсади клуб ўз даромадларини қандай ошириши ва операцион зарарларни қандай камайтириши мумкинлигини ўрганиш бўлгани ҳақидаги изоҳини қабул қиламиз. Longbow лойиҳасининг кўплаб йўналишлари ушбу мақсадларга эришишнинг ҳалол, қонуний уринишлари эди. Улардан бири эса бундай эмас эди — бу Fordham билан тузилган шартнома, — дейилади комиссия қарорида.
Вердиктга кўра, "Манчестер Сити" клубга эгалик қилувчи Abu Dhabi United Group (ADUG) компанияси учун шунчаки "ниқоб" бўлган Fordham компанияси билан шартнома тузган.
Комиссия "шаҳарликлар" Fordham'га футболчиларнинг имиж ҳуқуқларини сунъий равишда оширилган нархда сотган деган хулосага келди — битимларни расмийлаштириш учун Abu Dhabi United Group маблағларидан фойдаланилган.
Бундан ташқари, Fordham гўёки ўз имиж ҳуқуқларини "Манчестер Сити"га топширган футболчиларга тўловларни амалга оширган, ваҳоланки, аслида ўйинчиларга клуб эгалари тўлов қилишган.
Шу тариқа, Fordham билан тузилган шартнома ADUG'га "Манчестер Сити" ҳисобварақларига уларнинг ҳақиқий келиб чиқишини яширган ҳолда операцион даромад ниқоби остида қўшимча маблағлар киритиш, шунингдек, декларациялардан спортчиларнинг имиж ҳуқуқлари билан боғлиқ харажатлар ҳақидаги маълумотларни чиқариб ташлаш имконини берган.
Натижада, сохта шартнома туфайли даромадлар 24,5 млн фунтга ошириб кўрсатилган, харажатлар эса 49,414 млн фунтга камайтириб кўрсатилган.
