Igor Sergeev

Igor Sergeev harakat qiladigan “Al-Dafra” klubi safarda “An-Nasr” bilan bellashib, 0:1 hisobida imkoniyatni boy berdi. O'zbekistonlik hujumchi “Dafra”ning so'nggi o'yinida Amirlik chempionatidagi debyut golini urishga erishgandi. Bu safar u 63-daqiqada hakam tomonidan ogohlantirildi.

“Al-Dafra” turnir jadvalida 11-o'rinni egallab turibdi. Bu esa xavfli zona degani. Jamoa Sergeevsiz kechgan 1-davra o'yinida ham “An-Nasr”dan engilgandi - 1:2. Endi jamoa navbatdagi turni 1 mart kuni Aziz Haydarov to'p suradigan “Ajman” maydonida o'tkazadi. Shu kuni Haydarovning zimmasida Sergeevni qo'riqlash vazifasi bo'lsa ham ajablanmaymiz.

Aziz Haydarov

Liga debyutanti maqomini saqlab turgan “Ajman” mazkur turda so'nggi o'rinni egallab turgan jamoa maydonida durang o'ynadi. Shu tariqa klub yuqoriga ko'tarila olmadi. Biroq o'z poziciyasiga yanada mustahkamroq joylashdi.

Ajmanliklar “Emireytes” klubiga qarshi ilk davra o'yinida 3:2 hisobida ustun kelgandi. Har ikki o'yinda ham Haydarov to'liq o'ynadi. Yuqorida aytilgani kabi jamoa navbatdagi turda Sergeev to'p surayotgan klubni qabul qiladi.

Otabek Shukurov

Yaqindagina “Bunyodkor”ga qarshi o'rtoqlik o'yini o'tkazib, 1:3 hisobida imkoniyatni boy bergan “Sharja” klubi, chempionatning 17-turida sensacion natija qayd etdi. Mavsumni mag'lubiyatsiz o'tkazayotgan “Al-Ayn” futbolchilarining mag'lub etilishi mahalliy OAV tomonidan katta shov-shuv bilan qarshi olindi.

Umar Abdulrahmon 15-daqiqada hisobni tenglashtirgach, barchasi joyiga tushishi kerakdek edi. Biroq Shukurov jamoadoshlari keyin yana 2 ta gol urib, 3 ochkoni qo'lga kiritdi. Amirlik chempionatida yuzaga kelgan tanaffus “Sharja” foydasiga ishlagani ko'rinib turibdi. “Al-Ayn” esa Chempionlar Ligasida ham javlon urib, ko'rinishidan biroz toliqqan. Yoki yulduzli tarkib shunchaki raqibini mensimay harakat qilgan.

“Sharja” 6-o'ringa ko'tarildi. Navbatdagi yurish jamoani “Al-Jazira” bilan tenglashtirishi ham mumkin. Buning uchun yaxshi imkoniyat bor. Zero “Sharja” kelasi turni autsayder - “Emireytes” maydonida o'tkazadi. So'nggi 6 ta o'yinning 4 tasida zafar quchgan “Sharja” 1-davrada ham “Al-Ayn” bilan teng bellashib, 3:3 hisobida durang o'ynagandi.

Championat.asia statistikasi

Amirlik chempionatida to'p surayotgan o'zbekistonliklar deyarli har o'yinda 90 daqiqadan to'p tepmoqda. Milliy termaning Senegal va Marokashga qarshi o'yinlariga esa faqatgina Otabek Shukurov jalb qilindi, u hozir yaxshi formada. Aziz Haydarov va Server Jeparovni Kapadze bezovta qilishni istamadi. Sergeev esa termaga qaytishi uchun unga munosib ekanini yana bir karra isbotlab berishi shart. Balki buning uchun u jamoasini ham almashtirishi kerak bo'lar...

LegionerUz. Amirlik chempionatida sensacion natija: Otabek Shukurov jamoasi peshqadam “Al-Ayn”ni taslim qildi