Bugun "La Masiya"ning siz bilmaydigan 5 nafar tarbiyalanuvchisini sizga tanishtiramiz.

Xordi Gomes (Sanderlend)

Xordi Gomes asli kataloniyalik bo'lib, uning ilk futbol maktabi "Barselona" akademiyasi bo'lgan. U 2007 yilgacha "Barsa"ning turli jamoalarida o'ynagan va keyin Barselona shahrining yana bir klubi "Espanol"ga o'tadi. Xordi Gomes 2008-2009 mavsumda "Suonsi" safida 44ta o'yinda 12ta gol uradi va "Uigan" keyingi mavsumda uni o'z safiga qo'shib oladi. O'tgan yil "Sanderlend"ga o'tgan Gomes bu mavsumda Premer-liganing bor-yo'g'i 4ta uchrashuvida maydonga tushdi va hozircha gol urishgamuvaffaq bo'lgani yo'q.

Pepe Reyna (Napoli)

"Vilyarreal" va "Liverpul"da tanilgan ispaniyalik mashhur darvozabon Pepe Reyna "La Masiya" tarbiyalanuvchisi hisoblanadi. Reyna 14 yil davomida "Barselona"ning turli yoshdagi jamoalarida maydonga tushgan. Ayni damda posbon "Napoli" sharafini himoya qilmoqda.

Ektor Belerin (Arsenal)

Ektor Belerinning "Arsenal"dagi muvaffaqiyatlarida "La Masiya"ning xissasi katta desak adashmagan bo'lamiz. Chunki u 8 yoshidan "Barselona" akademiyasida futbol bilan shug'ullana boshlaydi. Uning akademiyada o'tkazgan 8 yili Belerin faoliyatida katta "musbat" bo'ladi. 2013 yilda "Arsenal" ushbu futbolchini o'z safiga qo'shib oladi. O'tgan mavsumda Ektor Premer-ligada eng tezkor hisoblangan Teo Uolkottdan ham tezroq yugura olishini isbotlaydi.

Mikel Arteta (Arsenal)

PSJ, "Real Sosedad", "Renjers", "Everton" kabi klublarda o'ynagan va hozirda "Arsenal" sharafini himoya qilayotgan Mikel Arteta ham jahonning mashhur akademiyalaridan biri bo'lgan "La Masiya" tarbiyalanuvchisi. 5 yil davomida "Barselona"ning turli yosh toifasidagi jamoalarida maydonga tushgan Mikel Arteta klubning asosiy jamoasida birorta ham o'yinda ishtirok etmagan. Artetani ko'pchilik Krishtianu Ronaldudan ham kuchliroq futbolchi bo'lib etishishini tahmin qilgan edi.

Mauro Ikardi (Inter)

"Sampdoriya"da professional faoliyatini boshlagan Ikardi "Inter"da A Seriyaning yulduziga aylandi. Ikardi turli akademiyalarda tahsil olgan va bu ro'yxatda "La Masiya" ham bor. Futbol mutaxassislari ushbu futbolchi kelajakda jahon futboli yulduzi bo'lishini tahmin qilishmoqda.

"La Masiya"ning siz bilmaydigan 5 tarbiyalanuvchisi