Bugun ertalab saytimizda xabar chiqdi: "Qozog'iston 15ta o'yindan beri g'alaba qozona olmayapti". Kecha tunda yon qo'shnilarimiz Fransiya bilan o'yinda 0:8 hisobida mag'lub bo'lishdi. Mbappe poker qayd etgan bahsda francuzlar umuman qarshilikka duch kelmadi. Ularning har bir hujumi gol bilan yakunlandi.

Shu o'yin bilan Qozog'istonning JCH-2022 saralashdagi yurishi tugadi. Jamoa guruh bahslarini atigi 3 ochko bilan oxirgi o'rinda tugatdi. 8 o'yin, 3 durang va 5 mag'lubiyat. G'alaba yo'q. To'plar nisbati 5-20.

Qozog'iston terma jamoasining UEFAga o'tganiga ancha bo'ldi. Lekin Yevropaga ketganidan beri hech "ko'karmay" qo'ydi. Chunki u erda kuchlilar ko'p-da. Qozog'iston Osiyoda ekanligida Olimpiadaga ham, Jahon chempionatiga ham chiqishi mumkin edi. Ammo UEFA - bu o'zga dunyo. Aytishingiz mumkin, ular JCHga chiqmagani bilan doim kuchlilar bilan o'ynayapti. Ha, o'ynayapti, lekin hadeb yutqazaversa bu nima beradi?

Endi tasavvur qilyapsizmi, agar O'zbekiston UEFAga o'tsa nima bo'lishini. Balki bahslashingiz mumkin, lekin men Qozog'iston terma jamoasini O'zbekistondan kuchli deb bilaman. Ayniqsa hozirgi terma jamoamizdan ular yaqqol ustun, garchi Fransiyadan 8ta gol "egan" bo'lsa ham. Qozog'iston OFKda ekanligida ularning har bir yoshdagi terma jamoasi bizni mag'lub etgan.

Yoki bo'lmasa sentyabr oyidan beri faqat Yevropa jamoalari bilan o'ynab kelayotgan Qatarni olaylik. Osiyo Kubogining amaldagi sohibi o'tgan yil Kopa Amerikada qatnashgandi, bu yil Gold Cup musobaqasida ishtirok etdi. Endi bo'lsa Yevropa jamoalari bilan o'rtoqlik uchrashuvi tashkil qilyapti. Qatar Yevropada 6ta o'yin o'tkazib, shundan 5tasida mag'lub bo'ldi. To'plar nisbati 2-19. Ko'ryapsizmi, Qatar 6 o'yinda atigi 2ta gol urib, o'z darvozasidan 19 bor to'p olib chiqqan. Kecha Serbiya ikkinchi bor qatarliklarni 4:0 hisobida mag'lub etdi.

Albatta, bu o'rtoqlik o'yinlari Qatarga foyda berishi mumkin, lekin har o'yinda 3-4talab gol o'tkazaversa, bosh murabbiy futbolchilarni ruhlantirish uchun so'z topa olarmikin. Hamma gap shunda.

Oxirgi paytlarda bizda ham UEFAga o'tishimiz kerak, OFKda "non" yo'q kabi gaplar yana yangrab qoldi. Lekin o'ylab ko'raylik, futbol rivojini xohlasak, albatta UEFAga borishimiz shart emas. Yaxshi tizim va dasturga ega bo'lib, OFKda ham rivojlansa bo'ladi. Mana, Yaponiya, Janubiy Koreya, Eron yoki Saudiya Arabistoni buning uddasidan chiqyapti-ku.

Qolaversa UEFA bizni aslo quchoq ochib kutib olmaydi, bunga real qaraylik. Men esa terma jamoamizni Yevropaga borib, Gibraltar darajasiga tushib qolishini xohlamayman.

Har erni qilma orzu...