Jumladan, yarim final bosiqichining ikkala juftligi ham muxlislarga bir olam hayajon, emociya taqdim qilgandi.

"Barselona" - "Liverpul"

Mazkur juftlik o'rtasida Kataloniyada o'tkazilgan birinchi bahsdan (3:0) keyin butun dunyo Messi tepgan jarima to'pini muhokama qilar, "ko'k-anorranglilar"ning finaldagi raqibi kim bo'lishi, "Tottenxem" yoki "Ayaks" "Barselona"ga qarshilik qila oladimi qabilidagi savollarga o'zicha javob izlardi. "Liverpul"ning eng ashaddiy muxlislari ham Saloh va Firminosiz jamoaning Messi boshchiligidagi katalonlarga qarshi mo'jiza ko'rsata olishiga deyarli ishonmagan bo'lsa kerak. Faqat Klopp va uning yigitlarigina bunga oxirigacha ishonishdi va isbotlashdi.

Uchrashuvga qadar Luis Suares UEFA rasmiy saytiga intervyu bergan: "Liverpul"dagi ajoyib mavsumlardan keyin yana "Enfild"ga qaytyapman. Bu men uchun o'zgacha ahamiyat kasb etadi. YCHL finaliga qadar yetib borish juda mushkul vazifa. Birinchi o'yindan keyin biz bunga juda yaqinmiz. Lekin qayerda o'ynayotganimizni unutmaylik. Bu erda muxlislar bir soniya ham to'xtab qolishmaydi. O'tgan yili "Roma"ga qarshi o'yinda yo'l qo'ygan xatolarimizni takrorlamaslikka urinamiz. YCHLda yarim soat emas, bir daqiqaga to'xtab qolish ham sizni musobaqadan chiqarib yuboradi".

Javob o'yinidan bir kun oldin Trent Aleksander-Arnold shunday degandi: "Albatta, raqiblarimizning barchasi jahon yulduzlari, ammo ularga etarlicha muammo tug'dirishimizga ishonaman. "Barsa"ga qarshi uchrashuvlarda Messi yoki boshqa o'yinchiga alohida e'tibor qaratish kerak emas, barchaga qarshi bir xil o'ynaymiz. Bizning yo'qotadigan narsamiz qolmadi, muxlislarimiz uchun oxirgi soniyalargacha harakat qilamiz".

O'yin o'tgan yilning ayni kunida o'tkazilgandi va yakunda Trentning fikrlari o'z tasdig'ini topdi. "Barselona" uchun eng katta muammoni o'yin oxirida aynan uning o'zi tug'dirgani yodingizda bo'lsa kerak. Marhamat, quyida o'sha lahzalarni eslash uchun uchrashuvdagi xavfli vaziyatlarning videolavhasiga e'tibor qaratishingiz mumkin.

2018-19, YCHL. Pley-off. 1/2 final
"Liverpul" - "Barselona" 4:0 (birinchi o'yin - 0:3)
Gollar: Origi, 7 (1:0); Veynaldum, 54 (2:0); Veynaldum, 56 (3:0); Origi, 79 (4:0)
"Liverpul": 13. Alison, 3. Fabino, 4. van Deyk, 26. Robertson E. ( 46') , 10. Mane, 14. Xenderson, 27. Origi (85') , 66. Aleksander-Arnold, 7. Milner, 32. Matip, 23. Shakiri (90')
Zahiradagilar: 22. Minole, 6. Lovren, 24. Bryuster, 58. Vudbern, 5. Veynaldum (46') , 12. Gomez (85') , 15. Starridj (90').
"Barselona": 1. Ter Shtegen, 15. Langle, 18. Alba X., 3. Pike, 5. Buskets, 7. Koutino (60') , 20. Roberto S., 22. Vidal (75') , 4. Rakitich (80') , 9. Suares L., 10. Messi
Zahiradagilar: 13. Sillessen, 23. Yumtiti, 24. Vermalen, 26. Alenya, 2. Semedu N. (60') , 8. Artur Ramos (75') , 14. Malkom (80').
Ogohlantirishlar: Fabino 11', Matip 66' - Buskets 45', Rakitich 53', Semedu N. 76'.

O'yindan keyin "Barselona" hujumchisi Luis Suares shunday fikrlarni bildirgandi: "Raqib to'rtinchi golni urganida biz maktab bolalariga o'xshab qoldik. Albatta, hozir biz va muxlislarimiz uchun juda qayg'uli vaziyat. Ammo har qanday tanqidlarga tayyor turishimiz kerak".

"LIVERPUL" SUPERKAMBEK KO'RSATGAN HOLDA "BARSELONA" TO'SIG'IDAN O'TIB, MUSOBAQANING FINALIGA YO'L OLDI!

Faxriddin Ro'ziev tayyorladi

"Enfild Roud"dagi betakror o'yinga bir yil to'ldi