"Қизиллар" ҳужумчиси Англия Лига Кубоги доирасида "Саутгемптон"га қарши ўйинда танаффусдан сўнг захирадан майдонга тушди ва 53-дақиқада рақибни ушлаб тургани, кейин эса тўпни отиб юборгани учун огоҳлантирилди.
85-дақиқада франциялик футболчи Кьезанинг узатмасидан унумли фойдаланиб, аниқ зарбаси билан мерсисайдликларни ҳисобда олдинга олиб чиқди – 2:1. Голдан сўнг Экитике футболкасини ечиб, трибунага кўз-кўз қилди. Бош ҳакам Том Бремелл унга иккинчи сариқни кўрсатди.
Жазо тариқасида клуб футболчини икки ҳафталик маошидан маҳрум қилиши хабар қилинганди. Бироқ Арне Слот буни рад қилди.
"Бу клубда жаримадан қўрқмасдан хато қилиш мумкин. У ёш йигит ва ажойиб инсон", – деди мутахассис.
