Samarqand shahridagi "Yoshlar markazi" katta zalida yuqori tashkilotchilikda o'tgan tadbirda jamoa azolari, viloyat hokimligi, homiy va mutasaddi tashkilotlar rahbarlari, muxlislar, Samarqand futbol jamoatchiligi ishtirok etdi. Bayramona taqdimot marosimi ilk marta 4ta telekamerada internetda jonli efirda namoyish etildi.

Tadbirni Samarqand viloyati hokimi, viloyat futbol associaciyasi prezidenti Erkinjon Turdimov ochib berishi rejalashtirilgandi, ammo viloyat hokimi malum sababga ko'ra marosimga kela olmagan bo'lsa-da, viloyat hokimining o'rinbosari Xurshid Ochilov marosim qatnashchilariga Erkinjon Oqbo'taevichning jamoa va muxlislarga yo'llagan yangi mavsum ochilish tabrigini o'qib eshittirdi.

Shundan so'ng "Dinamo" PFK bosh homiysi "Agromir Buildings" kompaniyasi raisi, senator Shavkat Jalolov, viloyat hokimining o'rinbosari Xurshid Ochilov klub yangi bosh murabbiyi serbiyalik Predrag Roganni tanishtirib, "Dinamo" futbolchilariga yangi liboslari topshirildi. Muxlislar nomidan viloyat hokimi Erkinjon Turdimov va "Agromir" kompaniyasi boshqaruv raisi Shavkat Jalolovga Samarqand futboli rivoji yo'lida qilinayotgan ishlar uchun minnatdorchilik bildirildi. "Dinamo" PFK nomidan esdalik uchun Erkinjon Turdimovga 69-raqamli libos (1969 yilda tug'ilgan), Shavkat Jalolovga 70-raqamli, Samarqand shahar hokimi Fazliddin Umarovga 78-raqamli klub libosi topshirildi.

Shuningdek, yangi murabbiy Rogan hamda futbolchilar nomidan Temurbek Ismoilov, Aleksandar Glishich so'zga chiqib, yangi mavsumda samarqandlik muxlislarni quvontirish uchun jamoa bor kuch va imkoniyatini sarflashini bildirishdi. Muxlislarning ochiq-savol javobi va olqishlari ostida yuqori kayfiyatda o'tgan tadbir yakunida barcha Superliga 1-turi doirasidagi 3 mart kungi "Dinamo" - "Paxtakor" o'yiniga taklif etildi.

"Dinamo" yangi futbolchilarni tanishtirdi